У адным з цэхаў “Гродна-Азота“ аварыйна спыненая вытворчасць аміяку

20 красавіка, Позірк. Пра “пазапланавы прыпынак цэха аміяк-3 са спыненнем узаемазлучанага з ім па сыравіне цэха карбамід-3“ паведаміла прадпрыемства “Гродна Азот“.

Інцыдэнт здарыўся 20 красавіка ў 6:23.

Адзначаецца, што “пры прыпынку і наступных пускавых аперацыях цэха аміяк-3 з мэтай ўтылізацыі гаручых рэчываў, якія ўваходзяць у склад тэхналагічнага газу, рэгламентам прадугледжана яго кароткачасовае спальванне на факельнай ўсталёўцы“. Пасля вызвалення ўсіх стадый вытворчасці ад гаручых газаў іх спальванне на факельнай ўстаноўцы спыняецца.

“Падстаў і падставы для занепакоенасці ў жыхароў горада, а таксама пагрозы экалогіі няма“, — сцвярджаецца ў паведамленні.

Папярэдні раз цэх аміяк-3 аварыйна спыняўся 3 верасня 2025 года. Прычынай назвалася “спыненне падачы паветра на стадыю рыформінгу цэха”.