Лукашэнка: Украінцы плацяць за сваё рашэнне абраць Зяленскага прэзідэнтам, яны таксама ў гэтым вінаватыя
Жэстыкуляцыя Аляксандра Лукашэнкі падчас характарыстыкі Уладзіміра Зяленскага як выхадца з шоў-бізнесу
20 красавіка, Позірк. У абранні сваім прэзідэнтам Уладзіміра Зяленскага абвінаваціў украінцаў Аляксандр Лукашэнка ў інтэрв’ю прапагандысцкаму тэлеканалу RT (раней Russia Today), якое ўзяў яго супрацоўнік амерыкана-кубінскага паходжання Рык Санчас.
“Мне шкада ўкраінскі народ. Але я вось перад інтэрв’ю з вамі думаў над гэтым пытаннем і прыходжу да высновы, што ўсё ж такі ўкраінцы плацяць за сваё рашэнне. Бо яны абралі Зяленскага прэзідэнтам? Яны. Яны ведалі, што ён не дасведчаны чалавек? Ведалі. Яны ведалі недахопы? Можа быць, не ведалі. Навошта галасавалі? Яны абралі рэальна прэзідэнтам Зяленскага”, — заявіў Лукашэнка.
“Я ж таксама быў такім жа “зялёным“, як ён, але ў мяне пад нагамі была зямля, досвед пэўны жыццёвы, а ў яго — шоў“, — сказаў былы дырэктар саўгаса “Гарадзец“ Лукашэнка, характарызуючы аднаго з заснавальнікаў студыі “Квартал-95“ Зяленскага, якая займалася вытворчасцю гумарыстычнага і сатырычнага кантэнту (у тым ліку шоў палітычнай і сацыяльнай сатыры “Вечаровы квартал”).
“І яны гэта таксама ведалі, украінцы. Але яны яго абралі. Праўда, там цяжка было з кагосьці выбіраць. Там і ў альтэрнатыве былі такія (у другім туры — дзейны прэзідэнт Пятро Парашэнка. — “Позірк“.). Яны яго абралі і цяпер за гэта плацяць. І вельмі дорага плацяць”, — лічыць Лукашэнка.
“Таму я не маю права папракаць украінскі народ, але хай украінцы разбяруцца, яны ж таксама ў гэтым вінаватыя. Яны дэмакратычным чынам абралі гэтага прэзідэнта”, — дадаў ён.
Лукашэнка — саўдзельнік расійскай агрэсіі супраць Украіны і вывазу ўкраінскіх дзяцей з акупаваных тэрыторый на падставе аздараўлення. Ён неаднаразова завочна прапаноўваў Зяленскаму прыняць крамлёўскія ўмовы міру, сцвярджаючы, што РФ усё роўна даб’ецца свайго вайсковым шляхам. У сваю чаргу рыторыка ўкраінскага прэзідэнта ў дачыненні да беларускага рэжыму і самога Лукашэнкі ў апошнія месяцы становіцца ўсё больш жорсткай. 17 красавіка ён заявіў, што характар і наступствы нядаўніх падзей у Венесуэле (захоп амерыканцамі прэзідэнта Нікаласа Мадура) “павінны стрымліваць кіраўніцтва Беларусі ад памылак“.
