Сергеенка возьме ўдзел у пасяджэнні Савета ПА АДКБ, дзе будуць абмяркоўвацца “тэмы знешняй палітыкі і калектыўнай абароны”

19 красавіка, Позірк. Старшыня Палаты прадстаўнікоў Нацыянальнага сходу (ПП НС) Ігар Сергеенка прыбыў у Маскву для ўдзелу ў пасяджэнні Савета Парламенцкай асамблеі Арганізацыі Дагавора аб калектыўнай бяспецы (ПА АДКБ), паведамляе прэс-служба ніжняй палаты парламента.

Адзначаецца, што ў аэрапорце Сергеенку сустрэлі намеснік старшыні Дзяржаўнай Думы Вікторыя Абрамчанка і намеснік генеральнага сакратара Савета Міжпарламенцкай асамблеі СНД — паўнамоцны прадстаўнік Нацсходу Беларусі ў гэтым саюзным органе і ПА АДКБ Сяргей Хаменка.

“Парадак дня маючага адбыцца пасяджэння ахоплівае шырокі спектр пытанняў: ад глабальнай бяспекі да гарманізацыі нацыянальных заканадаўстваў”, — гаворыцца ў паведамленні.

Заяўляецца, што ў цэнтры ўвагі на пасяджэнні будуць “тэмы знешняй палітыкі і калектыўнай абароны”.

У АДКБ уваходзяць Арменія, Беларусь, Казахстан, Кыргызстан, Расія і Таджыкістан. Армянскія ўлады замарозілі ўдзел краіны ў арганізацыі і заявілі аб магчымым выхадзе з блока. Ерэван абвінаваціў арганізацыю ў бяздзейнасці падчас канфлікту з Азербайджанам вакол Нагорнага Карабаха, а асобных членаў — у тым, што яны “планавалі вайну“ супраць Арменіі разам з Баку. Акрамя таго, улады Арменіі заявілі, што могуць разгледзець магчымасць выхаду з АДКБ і Еўразійскага эканамічнага саюза, калі Расія павысіць для краіны цэны на газ.

Расія пры падтрымцы беларускага рэжыму (ВПК, транспартныя шляхі, медыцына) пяты год вядзе поўнамаштабную вайну супраць Украіны.