Бюро дэлегацыі Еўрапарламента па Беларусі патрабуе вызвалення Алеся Бяляцкага
25 верасня, Позірк. Бюро дэлегацыі Еўрапарламента па Беларусі патрабуе неадкладнага і безумоўнага вызвалення кіраўніка праваабарончага цэнтру “Вясна”, лаўрэата Нобелеўскай прэміі міру палітвязня Алеся Бяляцкага, а таксама ўсіх іншых палітычных зняволеных, гаворыцца ў прымеркаванай да 63-годдзя праваабаронцы заяве Бюро.
Дакумент, падпісаны старшынёй дэлегацыі Малгажатай Гасеўскай, яе першым намеснікам Томасам Тобэ і другім намеснікам Міхалам Кабоскам, апублікаваў у сваім тэлеграм-канале беларускі палітык Анатоль Лябедзька (“Парламенцкі Канал”).
Адзначаецца, што Бяляцкі — “чалавек, чыё жыццё ўвасабляе мужнасць, стойкасць і нязменную адданасць справе свабоды і чалавечай годнасці”, знаходзіцца “на пярэднім краі барацьбы Беларусі за дэмакратыю, натхняючы не толькі сваіх суайчыннікаў, але і незлічоных людзей па ўсёй Еўропе і ва ўсім свеце”.
“Калі ў 1990-х гадах у Беларусі ўзмацнілася дыктатура, Алесь Бяляцкі адмовіўся маўчаць. У адказ на жорсткія рэпрэсіі супраць мірных дэманстрантаў ён заснаваў Праваабарончы цэнтр «Вясна» для падтрымкі палітычных зняволеных і іх сем’яў. Тое, што пачалося як акт салідарнасці ў цёмны момант, перарасло ў адну з вядучых праваабарончых арганізацый, якая дакументуе злоўжыванні, катаванні і парушэнні, учыненыя ўладамі”, — гаворыцца ў заяве.
Падкрэсліваецца, што праваабаронца адбывае пакаранне ў папраўчай калоніі № 9 у Горках Магілёўскай вобласці — “установе, вядомай сваім надзвычай жорсткім рэжымам”.
“У нас няма пацвярджэння яго цяперашняга стану здароўя. Яго ўтрымліваюць у поўнай ізаляцыі — пазбаўляюць права на перапіску і спатканні. Яго сям’я, вымушаная пакінуць Беларусь з-за палітычных пераследаў, не можа дасылаць яму пасылкі або аказваць фінансавую падтрымку, наўмысна падвяргаючы яго жорсткім і прыніжальным умовам. Гэтыя меры маюць на мэце зламаць яго дух”, — гаворыцца ў заяве.
Кіраўнік праваабарончага цэнтру “Вясна” Алесь Бяляцкі (лаўрэат Нобелеўскай прэміі міру 2022 года), яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч і каардынатар кампаніі “Праваабаронцы за свабодныя выбары” Уладзімір Лабковіч былі затрыманыя 14 ліпеня 2021 года. 3 сакавіка 2023 года ў рамках палітычна матываванай справы пра “кантрабанду грошай” і “фінансаванне парушэння грамадскага парадку” яны былі прыгавораныя да 10, 9 і 7 гадоў зняволення адпаведна.
У жніўні 2023 года Міністэрства ўнутраных спраў прызнала “Вясну” “экстрэмісцкім фарміраваннем”.
Судаленка: Трамп пасылае надзею на хуткае вызваленне Бяляцкага
25 верасня, Позірк. Праваабаронцы віншуюць з днём нараджэння кіраўніка цэнтра “Вясна”, палітвязня, лаўрэата Нобелеўскай прэміі міру 2022 года Алеся Бяляцкага. 25 верасня яму споўнілася 63 гады "Вясна" адзначае, што Бяляцкі сустракае за кратамі пяты дзень нараджэння запар, а ўлічваючы папярэдняе …
Бяляцкі быў і застаецца апорай для змагароў за свабоду — спікер Сейма Літвы
25 верасня, Позірк. Алесь Бяляцкі — адзін з самых яркіх змагароў за правы чалавека, "светач, які заззяў на небасхіле Беларусі, абараняючы правы і справядлівасць", заявіў спікер Сейма Літвы Юозас Олекас 25 верасня ў літоўскім парламенце на адкрыцці фотавыставы, прымеркаванай да …
