РФ хоча павялічыць імпарт бензіну з Беларусі

1 кастрычніка, Позірк. Нарасціць у кастрычніку пастаўкі беларускага бензіну ў Расію да 300 тыс. тон у месяц прапанаваў віцэ-прэм’ер РФ Аляксандр Новак прэм’ер-міністру Расіі Міхаілу Мішусціну, піша расійскае выданне “Коммерсант”.

Аб’ём паставак беларускага паліва ў Расію ў верасні, як паведамляе выданне, ацэньваецца ў 45 тыс. тон. Расійскі віцэ-прэм’ер прапанаваў павялічыць яго імпарт за кошт бесперабойнай працы сістэмы “Транснафта” і запуску давальніцкай перапрацоўкі нафты.

Мера прапануецца “для падтрымкі ўнутранага паліўнага рынку ва ўмовах падзення вытворчасці і недахопу бензіну ў некаторых рэгіёнах”.

Раней паведамлялася, што на фоне “высокага попыту і пазапланавых прыпынкаў нафтаперапрацоўчых заводаў” у ліпені пасля працяглага перапынку, які пачаўся восенню 2024 года аднавіліся продажы бензіну з Беларусі праз Пецярбургскую біржу.

За ліпень – верасень 2025 года на таргах рэалізавана 96,9 тыс. тон беларускіх нафтапрадуктаў – на 36% больш, чым за аналагічны перыяд 2024-га. У верасні продажы бензіну з беларускіх НПЗ выраслі на 168% месяц да месяца, а дызеля — на 83%”.

Пры гэтым, як заяўляецца, пастаўкі паліва з Беларусі “носяць нясталы характар, і на гэты раз іх аднаўленне супала з пачаткам росту напружання на ўнутраным рынку паліва ў Расіі”.

Праблемы з палівам узніклі ў РФ з-за рэгулярных нападаў украінскіх БПЛА на расійскія нафтаперапрацоўчыя заводы.

За 2023 год Беларусь паставіла ў Расію 45 тыс. тон бензіну і 270 тыс. тон дызпаліва.