У выніку аварыі ў Дзяржынску і яшчэ 196 населеных пунктах адключалася электрычнасць

24 кастрычніка, Позірк. У Дзяржынску і Дзяржынскім раёне (Мінская вобласць), аграгарадках Рубяжэвічы і Дзераўная Стаўбцоўскага раёна (Мінская вобласць) познім вечарам 23 кастрычніка спынілася падача электраэнергіі з-за аварыйнага адключэння на падстанцыі 110 кВ “Дзяржынск“ і 7 падстанцыях 35 кВ, паведамляе прэс-служба Міністэрства энергетыкі.

У выніку аварыі перасталі функцыянаваць 81 лінія 10 кВ, 716 цеплавых пунктаў і кватэрных цеплавых пунктаў, 197 населеных пунктаў, 49 малочна-таварных ферм, 15 кацельняў, 5 спажыўцоў 1-й катэгорыі (найбольш важныя, спыненне электразабеспячэння можа прывесці да буйных аварый і няшчасных выпадкаў), 65 спажыўцоў 2-й катэгорыі (рызыка прастояў прадпрыемства і транспарту).

Паводле інфармацыі Мінэнерга, электразабеспячэнне спажыўцоў Дзяржынскага і Стаўбцоўскага раёнаў было адноўлена неўзабаве пасля паўночы 24 кастрычніка.