За мінулыя суткі Літва зафіксавала рэкордную за тры гады колькасць спробаў парушэння мяжы з боку Беларусі
1 лістапада, Позірк. За мінулыя суткі, 31 кастрычніка, Літва зафіксавала 63 спробы мігрантаў незаконна перасекчы мяжу з боку Беларусі, сведчаць даныя на сайце Службы дзяржаўнай мяжы (САДМ) гэтай балтыйскай краіны.
Дарадца САДМ Гедрус Мішуціс паведаміў інфармагенцтву ELTA, што гэта рэкорднае значэнне за апошнія тры гады. Ён адзначыў, што 25 кастрычніка 2022 года памежнікі не дазволілі трапіць 81 мігранту, пасля чаго іх сутачная колькасць была значна ніжэйшай — да ўчорашняга дня.
“Нелегальныя мігранты спрабавалі прарвацца праз Лаздзійскі раён, але іх адпужалі памежнікі з Капчамесціса. Аніводзін мігрант не перасёк тэрыторыю Літвы”, — прыводзіць фрагмент той заявы прадстаўніка памежнай службы партал навін Delfi. —
Паводле слоў Мішуціса, спачатку на тэрыторыю краіны спрабавала прарвацца група з 32 чалавек, праз пару хвілін у паўкіламетры наводдаль — яшчэ 27, затым праз 10 хвілін у 2 км — трое, пазней — адзін.
“Мяркуецца, што такі спосаб быў абраны, каб разгрупаваць сілы памежнікаў і не даць ім паспець адрэагаваць, — заявіў ён. — Аднак памежнікі з Капчамесціса здолелі аператыўна адрэагаваць на ўсе тры напрамкі, прыбыўшы на службовых патрульных аўтамабілях, і гэтыя групы так і не трапілі ў Літву. <…> Тыя, хто прыйшоў, былі гатовыя пашкодзіць калючы дрот, кінулі металічныя нажніцы, пакінулі лесвіцы, пры сабе мелі рыдлёўкі”.
Згодна з праведзеным “Позіркам” аналізам, рэкордная для 2024 года сутачная колькасць спробаў парушэння літоўскай мяжы з боку Беларусі была зафіксавана 20 ліпеня (40), для 2023-га — 3 красавіка (55).
Латвія за мінулыя суткі прадухіліла 23 спробы незаконнага перасячэння мяжы з беларускай тэрыторыі.
З пачатку 2025 года суседнія краіны ЕС спынілі больш за 41 тыс. такіх спробаў, з якіх звыш 28 тыс. прыпала на Польшчу.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, бо іх туды нібыта “паклікалі”.
Апошняе выказванне прагучала 28 кастрычніка на ІІІ Мінскай міжнароднай канферэнцыі па еўразійскай бяспецы. Палітык заявіў, што Беларусь не мае прычын, каб “абараняць Еўрапейскі саюз, Еўропу ад мігрантаў”.
“Ва ўмовах усёабдымнага санкцыйнага ціску мы не маем ні лішніх рэсурсаў, ані маральных абавязацельстваў вырашаць праблемы тых, хто гэтыя санкцыі ўвёў. Нас душаць санкцыі, кажуць, абараняйце нас… Як толькі ўвялі санкцыі і разарвалі з намі стасункі па пытаннях міграцыі, я ім сумленна і шчыра сказаў: мы лавіць тут нікога не будзем і абараняць не будзем. <…> Мы не будзем вас абараняць з пятлёй на шыі. Санкцыі — гэта пятля на шыі беларускага народа. І вы ад нас патрабуеце вас бараніць? Гэтага не будзе”, — заявіў Лукашэнка.
