Намеснік кіраўніка МЗС абмеркаваў супрацу з рэгіянальным офісам федэрацыі Чырвонага крыжа, якая прыпыніла членства беларускай арганізацыі

5 лістапада, Позірк. Пазіцыю Мінска “ў дачыненні да працэсаў унутры” Міжнароднага руху Чырвонага Крыжа і Чырвонага Паўмесяца (ЧКіЧП), звязаных з наяўнай геапалітычнай сітуацыяй”, данёс да дырэктара Еўрапейскага рэгіянальнага офіса Міжнароднай федэрацыі таварыстваў ЧКіЧП Біргітэ Бішоф Эбесэн намеснік міністра замежных спраў Беларусі Ігар Сакрэта.

Паводле інфармацыі прэс-службы знешнепалітычнага ведамства, сустрэча адбылася 4 лістапада ў Жэневе. Разам з тым сутнасць пазіцыі міністэрства не канкрэтызуе.

Сцвярджаецца, што суразмоўцы “пацвердзілі ўзаемную зацікаўленасць ва ўмацаванні супрацы ў святле сур’ёзных рэгіянальных і глабальных выклікаў і важнасць удзелу ўсіх зацікаўленых партнёраў у аказанні падтрымкі асобам, закранутым канфліктнымі сітуацыямі”.

Адметна, што Міжнародная федэрацыя таварыстваў ЧКіЧП прыпыніла з 1 снежня 2023 года членства Беларускага Чырвонага Крыжа (БЧК) у арганізацыі, бо ў Мінску не выканалі выстаўленае 3 кастрычніка таго ж года патрабаванне вызваліць ад пасады генеральнага сакратара БЧК Дзмітрыя Шаўцова.

Прэтэнзіі ўзніклі праз яго візіты ў акупаваныя Расіяй украінскія гарады Луганск і Данецк, выкарыстанне сімволікі расійскіх акупантаў, заявы пра перамяшчэнне ўкраінскіх дзяцей.