Праца над новым пакетам санкцый супраць РФ і Беларусі ўжо вядзецца — еўракамісар па фінансах (дапоўнена)
дададзеныя абзацы 5–6
8 лістапада, Позірк. Праца над новым пакетам санкцый супраць Расіі і Беларусі ўжо вядзецца, заявіла еўрапейскі камісар па пытаннях фінансавай стабільнасці, фінансавых паслуг і саюза рынкаў капіталу Марыя Луіш Албукерке 7 лістапада ў Вільнюсе па выніках сустрэчы з міністрам фінансаў Літвы Крыступасам Вайцекунасам.
Такім чынам чыноўніца адказала на пытанне, чаго можна чакаць ад новых абмежавальных мер у дачыненні да Мінска.
“Мы толькі што ўхвалілі 19-ы пакет санкцый і пачынаем працу над наступным, — цытуе еўракамісара партал навін Delfi. — Пакуль рана казаць пра яго змест і пра тое, калі ён будзе вынесены на абмеркаванне і зацвярджэнне. Аднак магу вас запэўніць, што мы ўжо над гэтым працуем”.
“У той жа час мы працягнем працу па барацьбе з абыходнымі захадамі. Ведаеце, нават калі санкцыі ўхваленыя, маюцца трэція краіны, якія дапамагаюць іх абыходзіць. Гэта частка нашай бесперапыннай працы. [Мы працягваем працаваць, спрабуючы] знайсці шляхі, супрацоўнічаць з трэцімі краінамі, каб прадухіліць гэта, і кантраляваць гэты працэс, бо многія асобы, якія падтрымліваюць гэтае парушэнне, будуць уключаныя ў будучыя пакеты санкцый”, — дадала яна.
У сваю чаргу Вайцекунас, з задавальненнем адзначыўшы той факт, што прыняты ўжо 19-ы пакет санкцый, падкрэсліў, што неабходна працягваць ціск на Беларусь і Расію, у дачыненні да апошняй — асабліва “на энергетычны і фінансавы сектар”.
“Таму мы мусім пачаць сур’ёзныя дыскусіі па наступным пакеце санкцый, — прыводзіць словы чыноўніка прэс-служба Мінфіна Літвы. — У гэтым кантэксце, асабліва прымаючы да ўвагі гібрыдныя атакі з боку Беларусі, якія адбываюцца апошнім часам, мы таксама павінны пастрожыць санкцыі ў дачыненні да Беларусі, ураўняўшы іх з санкцыямі, што прымяняюцца да Расіі, і увёўшы дадатковыя абмежаванні”.
Як паведамляў “Позірк”, у 19-ы санкцыйны пакет ЕС супраць Расіі, прыняты 23 кастрычніка, унесеныя тры беларускія банкі — ЗАТ “Альфа-Банк” (брэнд “Альфа Банк у Беларусі”), “Сбер Банк (Беларусь)” і “Банк ВТБ (Беларусь)” (абмежавальныя меры набудуць моц 2 снежня). У рамках гэтага пакета таксама былі згаданыя Банк “БелВЭБ” і “Белгазпрамбанк”, якія трапілі пад абмежавальныя меры сёлета ў лютым.
Акрамя таго, пад абмежавальныя меры трапілі старшыня канцэрна “Белнафтахім” Ілья Ікан і генеральны дырэктар холдынгу “Гарызонт” Юрый Прадко, а таксама сам “Гарызонт”, арганізацыі “Інстытут лічбавага тэлебачання “Гарызонт” і “Галаграфічная індустрыя”.
Санкцыі ўведзеныя “ў сувязі з сітуацыяй у Беларусі і ўдзелам Беларусі ў расійскай агрэсіі супраць Украіны”.
5 лістапада міністр замежных спраў Літвы Кястуціс Будрыс паведаміў журналістам, што Вільнюс прадставіў калегам з ЕС прапановы пра тое, як маюць выглядаць новыя санкцыі, што прымяняюцца да Беларусі на міжнародным узроўні.
“Мы прадставілі свой пакет прапаноў, які ўтрымлівае як канкрэтныя фармулёўкі, так і эфект, — заявіў кіраўнік літоўскай дыпламатыі. — Літва не навічок у тэме санкцый. І пакеты мер, і прадстаўленыя намі аргументы ўспрымаюцца ўсур’ёз. Нам давяраюць”.
Паводле слоў чыноўніка, Вільнюс спадзяецца, што, “магчыма, пакет, які рыхтуецца, учыніць уплыў яшчэ да таго, як будзе прынятае канчатковае рашэнне пра санкцыі”.
Не выключана, лічыць Будрыс, што рэжым Аляксандра Лукашэнкі “зробіць высновы”, перш чым будуць выкарыстаныя “ўсе гэтыя захады”.
Якіх сфер тычацца прапановы па новых абмежавальных мерах, не ўдакладнялася.
Напрыканцы кастрычніка Будрыс заявіў, што спадзяецца на прагрэс Еўракамісіі ў пытанні санкцый супраць Беларусі да канца лістапада.
