Кіраўнік МУС Літвы прапанаваў абмеркаваць спыненне аўтобуснага злучэння з Беларуссю

7 снежня, Позірк. Разгледзець магчымасць спынення пасажырскага аўтобуснага злучэння з Беларуссю прапанаваў міністр унутраных спраў Літвы Уладзіслаў Кандратовіч.

“Гэта, вядома, адна з такіх мер. Пытанне толькі ў тым, як гэта паўплывае на беларускі рэжым — хваравіта ці, можа быць, не вельмі хваравіта, і, магчыма, узмоцніць варожыя настроі ў дачыненні да Еўрасаюза і іншых краін. Я думаю, што гэта сапраўды трэба разгледзець у дадзеным выпадку, трэба паглядзець, як усё складзецца”, — цытуе Кандратовіча LRT са спасылкай на агенцтва BNS.

Паведамляецца, што кіраўнік ведамства “мае намер абмеркаваць гэтае пытанне з польскімі і латвійскімі калегамі ў Брусэлі на наступным тыдні”.

“Мы будзем вырашаць гэтае пытанне сумесна. Таму што тут патрэбнае супольнае рашэнне, я думаю, не толькі з боку Латвіі, але і з боку Літвы і Польшчы. Нам трэба ўбачыць, які будзе агульны падыход”, — сказаў міністр.

У публікацыі звяртаецца ўвага, што такія захады цяпер рыхтуюць у Латвіі. Адзначаецца, што пастанова аб прыпыненні рэгулярных рэйсаў з гэтай краіны ў Беларусь і Расію “будзе прынятая зыходзячы з меркаванняў бяспекі і будзе прадугледжваць магчымасць перагляду пастановы ў выпадку змены сітуацыі”.

Паводле слоў Віргініюса Чышкаўскаса, прадстаўніка Адміністрацыі бяспекі транспарту Літвы (LTSA), цяпер аўтобусныя зносіны паміж Літвой і Беларуссю ажыццяўляюцца па 24 маршрутах.

“[Яны] ездзяць з Літвы праз адкрытыя пункты пропуску 25 разоў на дзень. З Літвы можна выехаць 25 разоў, і тыя ж 25 разоў вярнуцца з іншага боку”, — сказаў ён, удакладніўшы, што праз пункт пропуску Мядзінінкай (з беларускага боку Каменны Лог) праязджае 16 аўтобусаў, праз Шальчынінкай (Беняконі) — 9.

Паводле звестак літоўскага МУС, з пачатку года паветраную прастору краіны парушылі 599 кантрабандных аэрастатаў і 197 беспілотнікаў. Гэта прывяло да парушэння выканання 320 авіярэйсаў, пацярпела каля 47.000 пасажыраў, аэрапорты ў Вільнюсе і Каўнасе закрываліся сумарна амаль на 60 гадзін.

Апошнія некалькі гадоў кантрабандысты пачалі актыўна выкарыстоўваць метэазонды для нелегальнай дастаўкі цыгарэт з Беларусі ў Літву. Аднак гэтай восенню выпадкі прылёту аэрастатаў сталі настолькі частымі і масавымі, што літоўскія ўлады западозрылі рэжым Лукашэнкі ў садзейнічанні гэтай незаконнай дзейнасці. Як і ў выпадку з міграцыйным крызісам, сітуацыю з наплывам паветраных шароў палічылі элементам “гібрыднай атакі”.

У сувязі з рэгулярнасцю, масавасцю і напрамкам руху аэрастатаў у мэтах бяспекі даводзіцца закрываць паветраную прастору над аэрапортам Вільнюса. Праз вымушана скасаваныя, затрыманыя або перанесеныя ў іншыя аэрапорты рэйсы пакутуе мноства пасажыраў.

Апошні раз аэрапорт Вільнюса закрываўся ўвечары 6 снежня.

5 снежня прэм’ер-міністр Літвы Інга Ругінене паведаміла, што на наступным тыдні праз сітуацыю з паветранымі шарамі ў краіне будзе абвешчаны рэжым экстрэмальнай сітуацыі.

Напрыканцы кастрычніка Вільнюс закрыў пункты пропуску Мядзінінкай і Шальчынінкай, дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, што перашкаджалі ў тым ліку грамадзянскай авіяцыі Літвы.

Пагранпераходы аднавілі працу 20 лістапада. За тры тыдні, пакуль яны былі закрытыя, рэжым Лукашэнкі паспеў пастрожыць правілы знаходжання ў краіне літоўскага грузавога транспарту, увязаўшы іх з працай пунктаў пропуску. У Беларусі захрасла каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.

Пры гэтым Мінск настойвае, што далейшыя перамовы з Вільнюсам па гэтым пытанні павінны весціся на палітычным узроўні, Літва (прынамсі публічна) спрабуе пазбегнуць гэтага. Такія кантакты, на думку ўладаў балтыйскай дзяржавы, будуць азначаць легітымацыю беларускага рэжыму.