Скаргаў на сістэму ЖКГ дастаткова — віцэ-прэм’ер Сівак
11 лютага, Позірк. З 16 устаноўленых на 2025 год паказчыкаў Міністэрства жыллёва-камунальнай гаспадаркі выканала 13. Такія звесткі прагучалі на калегіі ведамства 11 лютага.
На фінансаванне галіны з кансалідаванага бюджэту летась было накіравана 4 млрд 421,5 млн рублёў: 857,1 млн — пакрыццё часткі расходаў па аказанні жыллёва-камунальных паслуг насельніцтву; 807,1 млн — капітальны рамонт жылфонду; 2 млрд 155,1 млн — добраўпарадкаванне населеных пунктаў.
Як заявіў намеснік прэм’ер-міністра Анатоль Сівак, скаргаў на сістэму жыллёва-камунальнай гаспадаркі, як і іншых недахопаў, дастаткова. Аднак, паводле яго слоў, агулам дынаміка працы ў галіны “носіць станоўчы характар“.
Паводле слоў кіраўніка МЖКХ Генадзя Трубілы, у 2025 годзе ўведзена ў эксплуатацыю пасля капрамонту 3 млн 586,8 тыс. кв. м агульнай плошчы жылых дамоў (97,4% плана). Выкананы рамонт (рэканструкцыя) 2.260 прыдамавых тэрыторый шматкватэрных жылых дамоў (125,6%) і 1 млн 98,5 тыс. кв. м дахаў жылых дамоў (111,9%). Адрамантавана 2.980 пад’ездаў (106%).
Заменена 68.244 адзінкі састарэлага асвятляльнага абсталявання, якое выкарыстоўваецца ў месцах агульнага карыстання, на святлодыёдныя свяцільні (122,6%), а таксама 569 ліфтаў (105,6%).
Чыноўнік падкрэсліў, што па выніках 2025 года “100% спажыўцоў водазабеспячэння забяспечаны якаснай пітной вадой”.
За мінулы год нарыхтавана 945,2 тыс. тон другаснай сыравіны (97,4%).
Як адзначыў Трубіла, прэтэнзій да якасці аказваемых ЖКП за 2025 год агулам па арганізацыях, якія ўваходзяць у сістэму Міністэрства, стала менш на 5,2% пры заданні -1,5%.
Усяго па адзіным нумары 115 і з дапамогай інтэрнэт-партала 115.бел было зарэгістравана 2 млн 656,7 тыс. прэтэнзій і заявак (без уліку кансультацый), што на 6,1% менш у параўнанні з 2024 годам.
Згодна з праведзеным “Позіркам“ маніторынгам цэн, у 2025 годзе з усіх ЖКП найбольш падаражэлі паслугі ў абыходжанні з цвёрдымі камунальнымі адкідамі (на 22,93%) і халоднае водазабеспячэнне (на 21,15%).
