За два месяцы фізічныя асобы прадалі наяўнай валюты на 413,2 млн долараў больш, чым набылі
7 сакавіка, Позірк. У студзені — лютым 2026 года насельніцтва Беларусі выступіла чыстым прадаўцом замежнай валюты, сведчаць даныя Нацыянальнага банка.
Фізічныя асобы набылі замежнай валюты на 1 млрд 943,9 млн долараў (тут і далей у эквіваленце), прадалі — на 2 млрд 184,1 млн (адмоўнае сальда — 240,2 млн).
Наяўнай валюты набыта на 1 млрд 220,6 млн, прададзена — на 1 млрд 633,8 млн (-413,2 млн), безнаяўнай — на 723,3 млн і 550,3 млн адпаведна (+173 млн).
У студзені фізічныя асобы набылі замежнай валюты на 995,2 млн долараў, прадалі — на 1 млрд 40,1 млн (адмоўнае сальда — 44,9 млн).
Такім чынам, у лютым аб’ём пакупкі склаў 948,7 млн долараў — на 4,7% менш, чым у першым месяцы года, сума продажу — 1 млрд 143,9 млн (+10%).
Міжнародныя рэзервовыя актывы Беларусі на 1 сакавіка 2026 года склалі 16 млрд 366,7 млн долараў у эквіваленце, што з’яўляецца новым рэкордам, сведчаць папярэднія даныя рэгулятара.
На 1 студзеня ЗВР складалі 14 млрд 423 млн долараў, 1 лютага — 15 млрд 702,8 млн.
У 2025 годзе насельніцтва Беларусі выступіла чыстым прадаўцом замежнай валюты. Фізічныя асобы набылі замежнай валюты на 12,95 млрд долараў (у эквіваленце), прадалі — на 14,58 млрд (адмоўнае сальда — 1,63 млрд).
Летась напрыканцы траўня старшыня праўлення Нацбанка Раман Галоўчанка назваў чысты продаж валюты насельніцтвам і суб’ектамі гаспадарання адным з двух фактараў, якія паўплывалі на рост міжнародных актываў: “Мы яе скупляем і, калі так можна сказаць, складаем пад вялікую дзяржаўную падушку”.
