Лукашэнка назваў жанчын “самым каштоўным” у жыцці

8 сакавіка, Позірк. З “выдатным, напоўненым прыемнымі эмоцыямі святам 8 сакавіка” павіншаваў жанчын Аляксандр Лукашэнка, паведамляе яго прэс-служба.

“Ён прыходзіць разам з вясной, абуджаючы ў сэрцах пачуцці захаплення і падзякі, якія мы дорым вам, дарагія жанчыны — крохкія і моцныя, уважлівыя і клапатлівыя, чароўныя і мудрыя. Вы — самае каштоўнае, што ёсць у нашым жыцці”, — заявіў віншавальнік.

“Дзякуй за тое, што ствараеце гармонію і ўтульнасць, саграваеце сваім цяплом, натхняеце нас, мужчын, на стварэнне”, — дадаў ён.

Лукашэнка пажадаў жанчынам сёлета “шмат радасных і шчаслівых імгненняў”. Хай “здзейсняцца запаветныя мары, а блізкія атачаюць любоўю і ўвагай”, гаворыцца ў віншаванні.

Годам беларускай жанчыны абвясціў 2026 год Лукашэнка ў навагоднім звароце.

“Мы ўшаноўваем нашых маці, жонак і дачок адзін дзень у годзе. Надышоў час аддаць належнае іх асаблівай ролі ў нашым жыцці“, — патлумачыў ён сваё рашэнне.

Лукашэнка заклікаў “берагчы нашу жанчыну і сваю зямлю, абараняць сваю будучыню — сям’ю, родных, блізкіх і сяброў ад бед і нягод”.

Паводле звестак праваабарончага цэнтра “Вясна”, у месцах пазбаўлення волі на 8 сакавіка знаходзяцца 164 жанчыны-палитзняволеныя. З пачатку 2020 года не менш за 1.917 жанчын было асуджана па палітычна матываваных крымінальных справах.

Гл. таксама:

Нармалізацыя сексізму. Як прапаганда ператварае жанчын у дадатак да мужчын