“Дом брэсцкага бусла” працягне працу, улады выдзелілі зямлю арганізацыі пасля публікацый у СМІ аб яе закрыцці

8 сакавіка, Позірк. Праект “Дом брэсцкага бусла” працягне працу, вынікае з паведамленняў у яе тэлеграм-канале.

Паводле слоў дырэктара арганізацыі Дзмітрыя Аўдзеева, Брэсцкі райвыканкам прапанаваў яму на выбар два ўчасткі зямлі для далейшай дзейнасці.

Аўдзееў падзякаваў мясцовым уладам за станоўчае вырашэнне пытання, назваўшы ўчасткі “адзін лепшы за другі”.

27 лютага стала вядома, што “Дом брэсцкага бусла” падасць дакументы на ліквідацыю.

Аўдзееў тады паведаміў, што 25 лютага ён быў на прыёме ў старшыні Брэсцкага райвыканкама Рыгора Панасюка, дзе арганізацыі “адмовілі ў арэндзе зямлі ў суседняй вёсцы”.

Разам з тым быў прапанаваны іншы ўчастак, але ён не падыходзіць па некалькіх прычынах: “Па-першае, 26 кіламетраў — гэта даволі далёка для нашага цэнтра, для нашай дзейнасці, бо ў цэнтры няма ўласнага аўтатранспарту. Другая, асноўная прычына: у месцы, дзе знаходзіцца ўчастак, белы бусел проста не гняздуецца і сацыялізацыя маладняку тут проста немагчымая, бо маладняк не можа звязацца з дзікімі бусламі”.

Як адзначыў дырэктар, ён да апошняга моманту змагаўся і спадзяваўся захаваць цэнтр, але абставіны аказаліся мацнейшымі.

“Няма месца для сімвала Беларусі пад Брэстам”, — рэзюмаваў ён, падкрэсліўшы, што вымушаны падаць дакументы на ліквідацыю.

Інфармацыя аб магчымым закрыцці праекта была апублікаваная ў многіх СМІ.

Прыродаахоўная ўстанова “Цэнтр дапамогі птушкам і жывёлам “Дом брэсцкага бусла” была зарэгістраваная 18 студзеня 2024 года Брэсцкім райвыканкамам у аграгарадку Медна (даныя на kartoteka.by).

На сайце арганізацыі пазначана, што цэнтр прызначаны для “лячэння, рэабілітацыі і далейшага выпуску на волю буслоў, якія трапілі ў бяду”.

“Гэта могуць быць дарослыя буслы, якія атрымалі траўмы, або аслабелыя ад інфекцый. А могуць быць і бусляняты, прынесеныя з розных месцаў. Першы час жыцця на волі іх падкормліваюць. Многіх буслоў прыходзіцца да моманту выпуску ўтрымліваць да 9 месяцаў. Бо ўжо ў канцы лета яны ляцяць у Афрыку, а аслабелыя трапляюцца да нас ужо падчас іх восеньскага міграцыйнага адлёту. Таму ім даводзіцца зімаваць у нашым цёплым зімніку, спецыяльна прызначаны для іх”, — адзначае цэнтр.

На 8 сакавіка тут утрымліваецца 14 белых і адно птушаня чорнага бусла, а таксама два птушаняты белага лебедзя.