Ціханоўская абмеркавала з кіраўніцай МЗС Латвіі “захаванне жорсткіх санкцый” супраць рэжыму Лукашэнкі

13 сакавіка, Позірк. “Захаванне жорсткіх санкцыяў” супраць рэжыму Аляксандра Лукашэнкі абмеркавала 12 сакавіка ў Рызе з міністрам замежных спраў Латвіі Байбай Бражэ дэмакратычны лідар Святлана Ціханоўская.

Размова таксама тычылася пытанняў рэгіянальнай бяспекі і паглыблення супрацы з Украінай, адзначыла беларускі палітык на сваёй старонцы ў сацыяльнай сетцы Х.

На сайце дэмлідара адзначана, што бакі абмеркавалі “пытанне палітвязняў і гуманітарны трэк: падтрымку вызваленых і іх сем’яў, а таксама магчымасць дапамогі праз Міжнародны гуманітарны фонд”.

Сярод іншага гаворка ішла пра “практычныя крокі для беларусаў у Латвіі”, у тым ліку неабходнасць “тэхнічных рашэнняў, якія дазваляюць людзям захоўваць мабільнасць і падтрымліваць сувязь з роднымі”.

Ціханоўская падзякавала Латвіі за “пастаянную ўвагу да беларускай тэмы і за падтрымку беларусаў, якія апынуліся ў складаных абставінах”.

“Для нас важна, каб беларусы ў Латвіі адчувалі сябе ў бяспецы, не заставаліся сам-насам са сваімі праблемамі ў выгнанні і мелі магчымасць падтрымліваць сувязь з роднымі. Трэба, каб рэжым не мог ізаляваць беларускае грамадства”, — падкрэсліла дэмлідар.

Згодна з інфармацыяй МЗС Латвіі, бакі падчас сустрэчы “былі аднадушныя” ў тым, што “палітыка аўтарытарнага рэжыму” Лукашэнкі не змянілася: “Рэпрэсіі ўзмацняюцца, арыштоўваюцца новыя палітычныя зняволеныя, працягваюцца гібрыдныя атакі на знешнія межы ЕС, у тым ліку інструменталізацыя мігрантаў; рэжым працягвае падтрымліваць агрэсіўную вайну Расіі супраць Украіны”.

Бражэ заявіла, што ў гэтай сітуацыі “ціск на беларускі рэжым павінен быць узмоцнены, у тым ліку шляхам узмацнення і ўзгаднення санкцый ЕС супраць Расіі і Беларусі”, апрача таго, “абыход санкцый праз Беларусь павінен быць прадухілены”.

Кіраўніца МЗС падкрэсліла “нязменнае патрабаванне” Латвіі да Беларусі — “вызваліць усіх палітычных зняволеных і спыніць іх прымусовую дэпартацыю”, а таксама “неадкладна забяспечыць бяспечнае вяртанне незаконна дэпартаваных украінскіх дзяцей ва Украіну”.

Адначасова Бражэ пацвердзіла “нязменную падтрымку” з боку Латвіі намаганням беларускіх дэмсіл “па стварэнні свабоднай і дэмакратычнай Беларусі”.

У той жа дзень падчас сустрэчы з прэзідэнтам Латвіі Эдгарсам Рынкевічсам Ціханоўская абмеркавала пытанні міжнароднай каардынацыі, у тым ліку магчымасці супрацы ў фармаце “Паўночна-Балтыйскай васьмёркі” (North-Baltic eight, NB8) і на пляцоўках ААН.