Восьмы дзень запар у Беларусі фіксуюцца тэмпературныя рэкорды
17 сакавіка, Позірк. Восьмы дзень запар у Беларусі абнаўляюцца тэмпературныя рэкорды, сведчыць праведзены “Позіркам“ параўнальны аналіз аператыўных і архіўных звестак Белгідрамета.
16 сакавіка новыя лакальныя максімумы зафіксаваныя на 11 метэастанцыях.
Перапісаныя два рэкорды, якія трымаліся з 1972 года, — у Брэсце (14,7 градуса супраць 14,5) і Лідзе (13,4 супраць 13). У Баранавічах ранейшы гістарычны максімум дня (12,6) быў адзначаны ў 1974 годзе, цяпер ён перавышаны на 0,6 градуса.
Найцяплей было ў Кобрыне і Гомелі, дзе паветра прагрэлася да 15,2 градуса (ранейшы рэкорд у абласным цэнтры — 11,8 у 2015 годзе).
