ДПК паведаміў аб рэзкім росце чаргі легкавых аўтамабіляў на мяжы з Польшчай

14 красавіка, Позірк. Аб рэзкім росце чаргі легкавых аўтамабіляў на мяжы з Польшчай паведаміў Дзяржаўны пагранічны камітэт (ДПК).

Ведамства адзначае, што за суткі колькасць легкавога транспарту на ўезд у Польшчу вырасла з 20 да 910 адзінак.

На 12 гадзін па мінскім часе ў пункце пропуску Брэст (на сумежным баку Цярэспаль) было зафіксавана 758 легкавых аўтамабіляў, у Брузгах (Кузніца Беластоцкая) — 100, у Бераставіцы (Баброўнікі) — 55. Таксама выезду з Беларусі ў польскім кірунку чакала без малога трыста грузавікоў — 258 у Казловічах (Кукурыкі) і 40 у Бераставіцы.

У сярэднім за суткі супрацоўнікі польскіх памежных пераходаў прынялі на сваю тэрыторыю 27% легкавых і каля 35% грузавых аўтамабіляў ад нормы, сцвярджае ДПК.

Мяркуючы па звестках на сайце ведамства, у літоўскім кірунку чарга з легкавых аўтамабіляў адсутнічала.

Пры гэтым уезду ў Літву перад пунктамі пропуску Каменны Лог (Мядзінінкай) і Беняконі (Шальчынінкай) чакала 90 і 220 велікагрузаў адпаведна. ДПК падкрэслівае, што “сумежны бок за суткі аформіў 28% грузавікоў ад нормы”.