17 красавіка, Позірк. Перамога апазіцыйнай партыі “Ціса” на парламенцкіх выбарах, якія прайшлі 12 красавіка ў Венгрыі, звязаная з “сур’ёзнымі заганамі, асабліва ва ўнутранай палітыцы“, партыі “Фідэс”, якую ўзначальвае прэм’ер-міністр Віктар Орбан. Такую заяву зрабіў Аляксандр Лукашэнка 17 красавіка ў інтэрв’ю амерыкана-кубінскаму журналісту Рыку Санчасу для падкантрольнага Расіі міжнароднага тэлеканала Russia Today.
Пры гэтым, як адзначыла прэс-служба Лукашэнкі, ён не пагадзіўся са здагадкай Санчэса аб тым, што перамога апазіцыі “можа быць звязаная з тым фактам, што яна атрымлівала фінансаванне і ўсялякую падтрымку з боку Еўрасаюза“. Лукашэнка запярэчыў тым, што і Орбан “атрымаў значную падтрымку, але з боку ЗША“.
“Орбан ведаў, што Еўрапейскі саюз будзе не з ім. Ну дык ты палітык, у цябе цэлая партыя! Вы павінныя былі супрацьстаяць гэтаму. Еўрасаюз у адкрытую падтрымліваў апазіцыю… А амерыканцы падтрымлівалі адкрыта Орбана. Таму справа не ў гэтым, — заявіў Лукашэнка. — Справа ў памылках, якія былі дапушчаныя ва ўнутранай палітыцы. Час пакажа, хто меў рацыю, хто вінаваты”.
Пры гэтым ён скарыстаўся момантам, каб адначасова выступіць з крытыкай Захаду і беларускай апазіцыі: “У нас таксама Захад усё жыццё падтрымліваў і фінансаваў нашу апазіцыю. І што? Нічога, таму што мы праводзім усё ж такі пры ўсіх памылках і недахопах нармальную палітыку ў дачыненні да ўласнага народа“.
Лукашэнка 13 красавіка павіншаваў лідара партыі “Ціса” Петара Мадзьяра з перамогай на парламенцкіх выбарах (у адрозненне ад прэзідэнта РФ Уладзіміра Пуціна). Палітык, як паведаміла яго прэс-служба, выказаў надзею, што “моцны голас Венгрыі на міжнароднай арэне будзе і надалей гучаць у духу прагматызму, накіраванасці на падтрыманне ўсеагульнай бяспекі, павагі да ўсіх народаў“.
Перамога партыі “Ціса “на выбарах у Дзяржаўную асамблею Венгрыі завяршыла 16-гадовае кіраванне “Фідэс” Орбана, які праводзіў, асабліва ў апошнія гады, антыеўрапейскую, антыўкраінскую, прарасійскую палітыку.
Венгрыя як член Еўрасаюза фармальна падтрымлівае санкцыі ЕС супраць беларускіх уладаў, аднак прадстаўленая ў Беларусі на ўзроўні амбасадара (найвышэйшы ўзровень дыпламатычнага прадстаўніцтва) — разам з членам ЕС Славакіяй, дзе прэм’ер-міністрам з’яўляецца прарасійскі настроены Роберт Фіца.
Орбан сустракаўся з Лукашэнкам у Мінску ў чэрвені 2020 года, у разгар эпідэміі коронавируса, за два месяцы да прэзідэнцкіх выбараў у Беларусі.
Адыходзячы міністр замежных спраў Венгрыі Петэр Сіярта за апошнія 2,5 года наведваў Мінск не менш за пяць разоў (у лістападзе 2023 года, траўні і кастрычніку 2024-га, верасні і кастрычніку 2025-га).
