МЗС Беларусі прапанаваў Кіеву арганізаваць пропуск на мяжы для збору дароў лесу
25 чэрвеня, Позірк. Ноту з прапановай арганізаваць “сезонны пропуск памежнага насельніцтва на тэрыторыю Беларусі для збору дзікаросаў“ перадало Міністэрства замежных спраў 25 чэрвеня часоваму паверанаму ў справах Украіны ў Мінску Івану Навіцкаму, паведамляе МЗС.
Знешнепалітычнае ведамства сцвярджае, што “гэта не палітычны жэст“, а “рацыянальная, прадыктаваная жыццём прапанова ў інтарэсах простых людзей, якія пражываюць у памежжы“: “Лес для іх — сур’ёзная дапамога ў хатняй гаспадарцы. Мы разумеем гэта і прапануем адладжаны механізм, які дазваляе захаваць звыклы ўклад жыцця без узвядзення штучных бар’ераў”.
З заявай аб гатоўнасці забяспечыць “пропуск жыхароў Украіны ў беларускія лясы ў Столінскім раёне Брэсцкай вобласці“ выступіў 25 чэрвеня Дзяржаўны памежны камітэт.
Дзяржаўная памежная служба Украіны не мае інфармацыі ад Мінска што да ініцыятывы, паведаміў спікер ДПСУ Андрэй Дземчанка “Украінскай праўдзе“.
“Мы не падтрымліваем сувязь з беларускімі памежнікамі. ДПСУ нічога ад іх не атрымлівала. І па іншых каналах таксама не атрымлівала. Больш за тое, Украіна не пагодзіцца на гэта, таму што гэта небяспечная лінія і пропуск у краіну, якая падтрымлівае краіну-тэрарыстку (РФ. — “Позірк”.), немагчымы“.
Паводле слоў Дземчанкі, практыка пропуску ўкраінцаў праз мяжу для збору дзікарослых ягад і грыбоў існавала шмат гадоў, але “гэта было да поўнамаштабнага ўварвання Расіі, чые войскі ўваходзілі ва Украіну, у тым ліку і з тэрыторыі Беларусі“.
З вясны 2022 года ні стацыянарныя, ні спрошчаныя пункты пропуску не дзейнічаюць.
Украінскія памежнікі “не фіксуюць спробаў парушэння мяжы з мэтай збору дзікарослых ягад і грыбоў”, сказаў спікер, дадаўшы, што саму мяжу працягваюць умацоўваць.
25 чэрвеня кіраўнік Чарнігаўскай ваеннай адміністрацыі Вячаслаў Чавус анансаваў паступовую эвакуацыю жыхароў 12 прыгранічных населеных пунктаў у рэгіёне з 1 ліпеня і аб яе працягу датычна сямі вёсак, дзе яна абвяшчалася зімой.
Гаворка ідзе пра ўсход беларуска-ўкраінскай мяжы, да якой прылягае Гомельская вобласць.
