31 жніўня, Позірк. Аб затрыманні 29-гадовага і 37-гадовага грамадзян Польшчы, якія з’явіліся ў месцы прызямлення паветранага шара з кантрабанднымі цыгарэтамі, паведаміла 31 жніўня польская паліцыя.
Адзначаецца, што шар прызямліўся ў Аўгустоўскім павеце, які мяжуе з Беларуссю, пасля чаго на месца неадкладна прыбылі супрацоўнікі крымінальнай паліцыі. Яны выявілі і канфіскавалі са скрутка 7.500 пачкаў цыгарэт без польскіх акцызных марак.
Пасля гэтага паліцыянты “пачалі назіраць за раёнам, правяраючы, ці не з’явяцца паблізу людзі, якія могуць быць звязаныя з адпраўленнем“. Адзначаецца, што “ў нейкі момант іх увагу прыцягнуў падазроны аўтамабіль, у якім знаходзіліся двое мужчын”.
Паводле інфармацыі паліцыі, жыхары Сувалкскага і Сейненскага паветаў патлумачылі, што прыехалі ў гэты раён пашукаць месца для рыбалкі. Аднак паліцыянты “хутка заўважылі, што пры сабе ў іх не было ніякіх рыбалоўных прыладаў“, таксама “іх увагу прыцягнуў мабільны тэлефон, які ляжаў у аўтамабілі, на якім адлюстроўвалася геалакацыя, якая ўказвае на раён, дзе прызямліўся паветраны шар з цыгарэтамі“.
Затрыманым прад’яўленыя абвінавачванні ў кантрабандзе падакцызных тавараў і ўхіленні ад выплаты мытных і падатковых плацяжоў у памеры больш за 250 тыс. злотых (каля 67 тыс. долараў ЗША).
27 жніўня “Польскае Радыё Беласток ” са спасылкай на агенцтва ПАП паведаміла, што ў памежным з Беларуссю Падляскім ваяводстве Польшчы было выяўлена чатыры кантрабандных паветраных шара з грузамі цыгарэт без польскіх акцызных марак.
28 жніўня прэс-служба Падляскага аддзялення памежнай аховы краіны паведаміла пра затрыманне дзевяці чалавек, “датычных да кантрабанды цыгарэт з Беларусі ў Польшчу з выкарыстаннем метэазондаў”. Сярод узятых пад варту чацвёра грамадзян Беларусі, трое — Польшчы, двое — Літвы.
Аўтарызавацца
Забыліся пароль?
Выхад з профілю
