Рассельгаснагляд не прапусціў у Пскоўскую вобласць 1 тону масла з Беларусі

7 жніўня, Позірк. Аб забароне ўвозу на расійскую тэрыторыю 1 тоны масла з Беларусі паведаміла Федэральная служба РФ па ветэрынарным і фітасанітарным наглядзе (Рассельгаснагляд).

Як адзначаецца, пры правядзенні ў вёсцы Лабок (Невельскі раён Пскоўскай вобласці РФ) ветэрынарнага кантролю прадукцыі, якая ўвозіцца, была ўстаноўленая “адсутнасць ветэрынарных суправаджальных дакументаў, якія пацвярджаюць паходжанне і бяспеку тавару”.

Акрамя гэтага, прадукцыя, якая патрабуе выканання тэмпературнага рэжыму пры транспартоўцы і захоўванні, “перамяшчалася з парушэннем ветэрынарна-санітарных патрабаванняў — у аўтатранспартным сродку не было халадзільнага абсталявання”.

Масла вернутае на тэрыторыю Беларусі.

У дачыненні да ўладальніка тавару складзеныя адміністрацыйныя пратаколы.