Рассельгаснагляд не ўпусціў у РФ з Беларусі 40 тон іспанскага шпіку

21 жніўня, Позірк. Аб спыненні спробы ўвозу з Беларусі каля 40 т свінога шпіку 17 жніўня праз пункт пропуску Чырвоная Горка (Смаленская вобласць) паведаміла Федэральная служба РФ па ветэрынарным і фітасанітарным наглядзе (Рассельгаснагляд).

Два грузавыя аўтамабілі рухаліся пад кіраваннем грамадзян Беларусі, якія перавозілі партыю названага тавару ў палімернай плёнцы. Шпік меў адбіткі ветэрынарных клеймаў іспанскага завода-вытворцы. Пры гэтым у яго адсутнічалі ветэрынарныя сертыфікаты і іншыя таварасуправаджальныя дакументы.

У адпаведнасці з указаннем Рассельгаснагляду з 1 лютага 2009 года ўвоз прадукцыі гэтага іспанскага прадпрыемства ў краіну “часова абмежаваны” (вытворца і прычыны не называюцца).

Грузавікі змешчаныя на аўтастаянку. Праводзіцца поўная выгрузка тавару і адбор узораў “для выключэння заносу хвароб жывёл і прыняцця канчатковага рашэння аб руху грузу”.

За мінулы перыяд 2026 года “ў выніку сумеснай працы з праваахоўнымі органамі і мытнымі службамі” да ўвозу з Беларусі не дапушчана і накіравана на перапрацоўку ў нехарчовых мэтах больш за 65 т “аналагічнай небяспечнай прадукцыі”, паведамляе служба.