Намеснік кіраўніка МЗС Сякрэта пакінуў запіс у кнізе спачуванняў у амбасадзе Польшчы ў сувязі з трагедыяй у Кракаве

9 лістапада, Позірк. Аб наведванні намеснікам міністра замежных спраў Ігарам Сакрэтам амбасады Польшчы ў Беларусі 9 лістапада паведаміла прэс-служба МЗС.

Дыпламат пакінуў запіс у кнізе спачуванняў у сувязі з гібеллю людзей у выніку тэракту ў Кракаве.

Як паведамляў “Позірк”, 8 лістапада Аляксандр Лукашэнка выказаў спачуванні “народу Польшчы”, зычыў акрыяння пацярпелым і перадаў словы падтрымкі родным і блізкім загінулых. Каму было адрасавана пасланне, яго прэс-служба не ўдакладніла.

Беларускі дэмакратычны лідар Святлана Ціханоўская выказала спачуванні ўвечары 7 лістапада, адзначыўшы, што беларусы падзяляюць скруху польскага народа. На наступны дзень яна пажадала акрыяння паліцыянтам Якубу Куліку і Артуру Мараньскаму, якія атрымалі раненні пры затрыманні нападніка, і падзякавала ўсім, хто прыйшоў на дапамогу.

Днём 7 лістапада мужчына, які перасоўваўся на аўтамабілі, адкрыў страляніну па мінаках на плошчы Галоўны рынак у цэнтры Кракава, а таксама абстраляў трамвай на пл. Усіх святых. Паліцыя пераследавала нападніка — 24-гадовага грамадзяніна Польшчы. Падчас перастрэлкі ён быў цяжка паранены і шпіталізаваны.

Загінулі шэсць чалавек, раненні атрымалі ў тым ліку двое паліцэйскіх. Целы яшчэ трох загінуўшых знайшлі ў доме страляючага. Пазней было пацверджана, што гэта яго бацькі і сястра.

У Кракаве аб’яўлена жалоба да 11 лістапада, на агульнанацыянальным узроўні — да 9-га.

Раніцай 9 лістапада паліцыя Малапольскага ваяводства паведаміла, што нападнік памёр у шпіталі. Паводле актуальных звестак улад Кракава, у выніку нападзення раненні атрымалі 15 чалавек.