Еўрапарламентарыі заклікалі Еўрасаюз скараціць колькасць беларускіх дыпламатаў у адказ на інцыдэнт з прадстаўніком ЕС у Мінску Шульц

9 верасня, BPN. Старшыня дэлегацыі Еўрапарламента па сувязях з Беларуссю Юозас Олекас і дакладчык ЕП па Беларусі Пятрас Аўштравічус 8 верасня выступілі з сумеснай заявай у сувязі з кароткатэрміновым затрыманнем часовай паверанай у справах Еўрасаюза ў Мінску Эвеліны Шульц.

“Гэтая абуральная правакацыя — наўпрост фізічны напад на акрэдытаванага дыпламата — яшчэ адно сведчанне таго, што рэжым [Аляксандра] Лукашэнкі не спыняецца ні перад чым на сваім дэструктыўным шляху, нават калі гэта азначае паставіць пад пагрозу тое, што засталося ад дыпламатычных адносін з суседзямі, — гаворыцца ў дакуменце. — Гэта таксама грубае парушэнне міжнародных дагавораў, ратыфікаваных самой Беларуссю, найперш Венскай канвенцыі аб дыпламатычных зносінах”.

“Мы заклікаем Еўрапейскі саюз і яго дзяржавы-члены да жорсткага адказу на гэты абуральны ўчынак, а менавіта да неадкладнага скарачэння колькасці беларускіх дыпламатаў, акрэдытаваных у Бруселі і іншых еўрапейскіх сталіцах, а таксама перагляду сваёй дыпламатычнай прысутнасці ў Беларусі”, — адзначылі Олекас і Аўштравічус.

Еўрапарламентарыі ў чарговы раз заклікалі беларускія ўлады “неадкладна і безумоўна вызваліць усіх палітзняволеных, зняць з іх усе абвінавачанні і пачаць сапраўдны інклюзіўны дыялог з дэмакратычнымі сіламі і грамадзянскай супольнасцю, каб знайсці выйсце з цяперашняга крызісу і забяспечыць мірныя палітычныя пераўтварэнні”.

Эвеліна Шульц была затрыманая на дзве гадзіны пасля абвяшчэння прысуду па “справе анархістаў”. “6 верасня каля 15.35 мяне сілком затрымалі пры выхадзе з будынка Мінскага гарадскога суда пасля гутаркі ў фае <…> з грамадзянамі, якія прысутнічалі на публічным абвяшчэнні прыгавору ў закрытым судовым пасяджэнні, паводле якога дзесяць палітвязняў былі прыгавораныя ў агульнай складанасці да 94 гадоў пазбаўлення свабоды”, — паведаміла BPN дыпламат.

Паводле слоў Шульц, яна неаднаразова давала зразумець, што валодае дыпламатычнай недатыкальнасцю, прад’явіўшы як дыпламатычную карту, так і дыпламатычны пашпарт.

“У канцы майго затрымання каля 17.30, калі прыбыў прадстаўнік дзяржпратакола МЗС, супрацоўнік міліцыі папрасіў мяне праз прадстаўніка МЗС (які перакладаў) прыняць афіцыйны “пратакол” (абвінаваўчае заключэнне?) і падпісаць яго, — працягнула Шульц. — На працягу ўсёй гэтай “размовы “я настойвала на захаванні майго дыпламатычнага імунітэту і на прысутнасці прадстаўніка дэлегацыі ЕС і/ці консулаў Польшчы ці Германіі”.

Паводле слоў дыпламата, падчас чытання пратакола яе здымалі на відэакамеру.

ЕС і яго беларускае прадстаўніцтва выказалі пратэст у сувязі з затрыманнем Шульц. У Бруселі для дачы тлумачэнняў была выклікана часовая павераная ў справах Беларусі ў ЕС.

У сваю чаргу Шульц выклікалі ў МЗС Беларусі, дзе ёй выказалі незадаволенасць наведваннем замежнымі дыпламатамі судоў, “крайні раз” папярэдзілі пра “магчымыя наступствы правакацый” і праінфармавалі аб прымяненні беларускім бокам “дадатковых мер рэагавання да Прадстаўніцтва ЕС”.