Кампанія “БелВЭБлізінг” прафінансавала куплю вагонаў-хопераў для “Беларуськалія”

28 верасня, BPN. Кампанія “БелВЭБлізінг” прафінансавала пастаўку “Беларуськалію” вагонаў-хопераў для перавозкі мінеральных угнаенняў.

Прэс-служба “Банка БелВЭБ” паведамляе, што тэхніка закупляецца паводле праграмы “абнаўлення транспартна-лагістычнага комплексу беларускага экспарцёра”.

Першая партыя новых вагонаў прыбыла ў Салігорск (Мінская вобласць) на пачатку верасня. Усяго ў рамках экспартнага праекта на чыгуначную пляцоўку вытворцы і экспарцёра калійных угнаенняў прыбудзе 1.300 спецыяльных закрытых вагонаў-хопераў расійскай вытворчасці.

Кампанія “БелВЭБлізінг” была створаная ў 2018 годзе пры ўдзеле расійскай дзяржаўнай карпарацыі развіцця “ВЭБ.РФ” і беларускага “Банка БелВЭБ”. Асноўны напрамак дзейнасці кампаніі — лізінгавае фінансаванне пад пастаўкі высокатэхналагічнага абсталявання, вырабленага ў Расіі.

“Банк БелВЭБ” (раней “Белзнешэканомбанк”) трапіў пад амерыканскія санкцыі, уведзеныя супраць Расіі.

Галоўным акцыянерам банка з’яўляецца “ВЭБ.РФ”, якой належыць 97,52% акцый. Яна ўвайшла ў санкцыйны спіс ЗША, прыняты ў адказ на прызнанне Расіяй незалежнасці так званых данецкай і луганскай народных рэспублік — раёнаў Данецкай і Луганскай абласцей Украіны, якія не кантралююцца Кіевам.

У сувязі з падтрымкай уладамі ў Мінску ваеннай агрэсіі Расіі ўкраінскія ўлады шукаюць і арыштоўваюць на сваёй тэрыторыі маёмасць беларускіх кампаній, у тым ліку вагоны для перавозкі калійных угнаенняў і самі ўгнаенні.

Так, 2 верасня Нацыянальная паліцыя паведамляла аб арышце 390 чыгуначных вагонаў, якія належаць двум беларускім і васьмі расійскім прадпрыемствам на агульную суму каля 400 млн грыўняў (10,9 млн долараў).

Паводле афіцыйных звестак, на 24 лютага, калі пачалося поўнамаштабнае ўварванне РФ, на тэрыторыі Украіны знаходзілася больш за 7 тыс. вагонаў, якія належаць Беларускай чыгунцы і іншым прадпрыемствам краіны.