Сейм Літвы канчаткова зацвердзіў зброевую забарону для грамадзян Беларусі і РФ, якія пастаянна пражываюць у краіне

22 снежня, BPN. Сейм Літвы 22 снежня канчаткова зацвердзіў папраўкі да закону аб кантролі над зброяй і боепрыпасамі, паведамляе прэс-служба літоўскага парламента.

За змены выступілі 112 дэпутатаў, устрымаліся — 13, супраць — 1. Адметна, што 15 снежня, калі ў сейме разглядалі склад правак, іх ухвалілі 106 парламентарыяў, устрымаліся — 10, а супраць ніхто не выступіў.

Папраўкі, якія набудуць моц 1 красавіка 2023 года, сярод іншага забараняюць грамадзянам Беларусі і Расіі, якія пастаянна жывуць у Літве, набываць і захоўваць зброю, зброевыя прыналежнасці, боепрыпасы і іх часткі.

Пасля пачатку дзеяння абноўленага закона тыя беларускія і расійскія грамадзяне, у каго ўжо ёсць зброя, павінны будуць на працягу года адмовіцца ад яе — прадаць, перарабіць у небаявую або здаць у паліцыю. Дазволы на захоўванне ці нашэнне зброі будуць ануляваныя. У адваротным выпадку зброя будзе канфіскаваная.

Раней паведамлялася, што ў Літве зброяй валодаюць 42 грамадзяніны Беларусі і 294 грамадзяніны Расіі.

1 снежня такая забарона пачала дзейнічаць у Эстоніі.