Ціханоўская вызваліла Азарава ад пасады прадстаўніка АПК (дапоўнена)

6 жніўня, Позірк. Дэмакратычны лідар Святлана Ціханоўскай вызваліла Аляксандра Азарава ад пасады прадстаўніка Аб’яднанага пераходнага кабінета (АПК) па аднаўленні правапарадку. Аб гэтым яна паведаміла на канферэнцыі “Новая Беларусь” у Варшаве 6 жніўня.

Пры гэтым, паводле словаў палітыка, Азараў працягне ажыццяўляць каардынацыю плана “Перамога” ў супрацоўніцтве з кабінетам.

Пазіцыя ў АПК застаецца вакантнай.

Раніцай Каардынацыйная рада паведаміла, што рэкамендавала не працягваць паўнамоцтвы Азарава. Раней КР падоўжыла да 8 жніўня 2024 года паўнамоцтвы Аліны Коўшык (прадстаўнік па нацыянальным адраджэнні), Валерыя Сахашчыка (па абароне і нацыянальнай бяспецы), Вольгі Гарбуновай (па сацыяльных пытаннях), Валера Кавалеўскага (па замежных справах) і Паўла Латушкі (па транзіце ўлады).

Таксама Ціханоўская прызначыла кіраўніком місіі дэмакратычнай Беларусі ў Кіеве Генадзя Манько, прадставіўшы яго як чалавека, які працяглы час забяспечваў камунікацыю яе офіса з палком Каліноўскага, якi ваюе на баку Украіны.

Пазіцыю дарадцы дэмлідара па маладзёжнай палітыцы і студэнцтве заняла кіраўнік студэнцкай арганізацыі “Рада” Маргарыта Ворыхава.