“Газпром” працягнуў кантракты на пастаўку газу ў Беларусь да 2025 года

8 лютага, BPN. Кошт расійскага газу, які пастаўляецца ў Беларусь, арыенціровачна складзе 250 млрд расійскіх рублёў (больш за 3,5 млрд долараў), а кошт паслуг па транзіце па беларускай тэрыторыі — 12 млрд (каля 169 млн), гаворыцца на сайце “Газпрома”.

Паведамляецца, што расійская кампанія і яе даччынае прадпрыемства “Газпром трансгаз Беларусь” працягнулі кантракты на пастаўку газу ў Беларусь на 2023–2025 гады.

Папярэднія кантракты дзейнічалі да канца 2022 года.

3 лютага расійскае дзяржагенцтва ТАСС са спасылкай на міністра энергетыкі РФ Мікалая Шульгінава паведаміла, што цана расійскага газу для Беларусі ў 2023 годзе застанецца ранейшай з разлікам у расійскіх рублях.

Кошт расійскага прыроднага газу для Беларусі ў 2022 годзе складаў 128,52 долара за тысячу кубаметраў.

Беларусь з красавіка мінулага года перайшла на расійскія рублі пры разліках за пастаўкі энерганосьбітаў з РФ.

Аб тым, што Мінск пакуль не адчуў прыкметных зрухаў ад інтэграцыі з Масквой у сферах энергетыкі і прамысловасці, заявіў Аляксандр Лукашэнка 12 студзеня на нарадзе па інтэграцыйнай тэматыцы.

“Выкананне праграм па фарміраванні аб’яднаных рынкаў газу, нафты і нафтапрадуктаў запатрабавала вынясення пытання на вышэйшы ўзровень, — сказаў ён. — Падчас снежаньскіх перагавораў з прэзідэнтам Расіі неабходныя развязкі былі знойдзены (як мінімум на тры гады). Зараз ідзе работа над замацаваннем дасягнутых дамоўленасцей. у дзейных дакументах”.