Качанава хоча, каб у Беларусі адзначалі Дзень Пятра і Фяўронні, а не Дзень святога Валянціна

29 верасня, Позірк. Традыцыйнымі каштоўнасцямі Беларусі з’яўляюцца шлюб паміж мужчынам і жанчынай, нараджэнне дзяцей у традыцыйнай сям’і, заявіла 29 верасня старшыня Савета Рэспублікі Нацыянальнага сходу (СР НС) Наталля Качанава на сустрэчы з актывам Беларускага саюза жанчын Маскоўскага раёна Мінска.

“Цяпер мы сталі ўсведамляць: Дзень святога Валянціна адзначалі, чаму не Дзень Пятра і Фяўронні, якія з’яўляліся сімвалам веры, адданасці і любові адзін да аднаго? І зараз мы вырашылі больш настойліва распавядаць пра традыцыйныя каштоўнасці, пачынаючы з дзіцячага дашкольнага ўзросту. Таму што і ў дачыненні да сям’і можна дайсці да абсурду — мы гэта бачым у іншых краінах”, — цытуе Качанаву прэс-служба СР НС.

Яна выказала занепакоенасць, што сярэдні ўзрост уступлення ў шлюб у Беларусі 27 гадоў: “Мы не можам за гэта не перажываць. Сумесна з Беларускай праваслаўнай царквой будзем праводзіць мерапрыемствы па захаванні сямейных каштоўнасцяў. Мы паслухаем нашых урачоў, педагогаў, тых, хто непасрэдна працуе з моладдзю”.

29 снежня мінулага года Качанава падчас пасяджэння “савета старэйшын” выказала здагадку, што Беларусі па прыкладзе Расіі трэба прыняць закон аб забароне прапаганды ЛГБТ: “І гэта будзе правільна. Нельга гэта прапагандаваць. У нас ёсць сямейныя каштоўнасці, традыцыі, якія мы перадаем з пакалення ў пакаленне: традыцыі сям’і, праваслаўя”.

Паводле звестак Белстата, сярэдні ўзрост уступлення ў першы шлюб мужчын у Беларусі — 28,7 года, жанчын — 26,5 года. З 2017-га гэты паказчык для абодвух палоў павялічыўся амаль на 1 год. Тады мужчыны ўступалі ў першы шлюб у 27,9 года, а жанчыны ў 25,8 года. Павелічэнне ўзросту ўступлення ў шлюб з’яўляецца агульнаеўрапейскім трэндам.

У Канцэпцыі развіцця нацыянальнай культурнай прасторы ва ўсіх сферах жыцця грамадства на 2024–2026 гады Міністэрства культуры адзначае важнасць фарміравання і замацавання практыкі святкавання народных і сучасных грамадзянскіх святаў, “якія адлюстроўваюць традыцыйныя каштоўнасныя арыентацыі беларускага народа (Дзень Незалежнасці Рэспублікі Беларусь (Дзень Рэспублікі), Дзень народнага адзінства, Дзень Перамогі, Дзень маці, Дзень бацькі, народныя святы, звязаныя з сельскагаспадарчым календаром, і іншыя)”. Пры гэтым сярод напрамкаў канцэпцыі паказаны “адмова ад замежных святаў (Дзень святога Валянціна, Хэлоўін і таму падобных)”.Дзень Пятра і Фяўронні прымеркаваны да Дня памяці святых князя Пятра і яго жонкі Фяўронні, якія жылі ў XIII стагоддзі ў Мурамскім княстве (цяпер горад Мурам Уладзімірскай вобласці, РФ). У праваслаўнай традыцыі яны лічацца заступнікамі сям’і і шлюбу. У Расіі свята адзначаецца 8 ліпеня.