Лукашэнка: Руская мова — гэта не расійская мова, а агульны здабытак

13 кастрычніка, Позірк. Руская мова — гэта “не расійская мова”, а “агульны здабытак”, заявіў Аляксандр Лукашэнка 13 кастрычніка на саміце Садружнасці Незалежных Дзяржаў у Бішкеку (Кыргызстан).

Паводле слоў Лукашэнкі, якія перадае яго прэс-служба, ініцыятыва прэзідэнта Казахстана Касым-Жомарта Токаева заснаваць Міжнародную арганізацыю па рускай мове з’яўляецца “вельмі своечасовай і запатрабаванай”. Ён сцвярджае, што многія прадстаўнікі моладзі ў СНД “размаўляюць на рускай мове горш і слабей, чым на англійскай і іншай мове”.

“Можам дагрукацца да таго, што будзем мець зносіны праз перакладчыка. Нельга страціць мову міжнацыянальных зносін, як яе называюць. І потым, я наогул не разумею, а чаму яе павінны страціць? Яна што, шкодзіць нам, нашаму пакаленню? Не. Яна не мае шкодзіць і пакаленню нашых дзяцей”, — заявіў Лукашэнка, назваўшы валоданне рускай мовай “найвялікшым здабыткам”.

У рускай мове, на яго думку, маецца “часцічка” не толькі “рускіх і беларусаў”, але і “азербайджанцаў, узбекаў, таджыкаў і гэтак далей”, паколькі гэтыя народы “былі ў адзінай дзяржаве доўгі час”.

У гэтым кантэксце Лукашэнка “цешыць тэндэнцыя ў сярэднеазіяцкіх краінах, уключаючы Таджыкістан, Кыргызстан, Узбекістан, дзе з’яўляюцца новыя школы і ўніверсітэты, у якіх вывучаюць і выкладаюць на рускай мове”.

10 кастрычніка Лукашэнка ўхваліў праект дамовы аб заснаванні Міжнароднай арганізацыі па рускай мове. Яго плануецца падпісаць 13 кастрычніка па выніках саміту СНД.

Адметна, што ўлады ў Мінску, згаджаючыся ўдзельнічаць у распаўсюдзе рускай мовы, зусім не праяўляюць інтарэсу да папулярызацыі беларускай мовы. Дзесяцігоддзямі яе развіццё было прэрагатывай грамадскіх ініцыятыў і арганізацый, якія рэжым Лукашэнкі знішчыў ці выціснуў за межы Беларусі. У краіне праводзіцца палітыка русіфікацыі.

Паводле перапісу насельніцтва, колькасць беларусаў, якія лічаць сваёй роднай мовай беларускую, знізілася з 85,6% у 1999 годзе да 61,2% у 2019-м.

Намінальна 40% школ у краіне — беларускамоўныя, але навучаецца ў іх усяго каля 10% вучняў (крыху больш за 100 тыс.).