Мінфін лічыць пагрозай нацыянальнай бяспецы продаж квіткоў пасажырам на сайтах, фізічна размешчаных за мяжой

Апублікавана на адкрытай версіі “Позірку” 26 кастрычніка 2025 года ў 15:23

18 кастрычніка, Позірк. На тэрыторыі Беларусі функцыянуе мноства дублюючых сэрвісаў у сферы перавозак пасажыраў, паміж якімі не наладжана належнае ўзаемадзеянне. У выніку грамадзяне “вымушаныя наведваць некалькі сайтаў для здзяйснення паездкі, што абцяжарвае працэс планавання маршруту і куплі квіткоў“. Пра гэта піша начальнік упраўлення фінансаў жыллёва-камунальнай гаспадаркі, транспарту і сувязі Мінфіна Ала Рыжкова ў артыкуле для навукова-практычнага часопіса “Финансы. Учет. Аудит“ (заснавальнікі — Мінфін, Беларускі дзяржаўны эканамічны універсітэт, Беларускі дзяржаўны універсітэт, “Белдзяржстрах”).

У прадстаўніка ведамства “выклікае асцярогі і тое, што частка профільных інтэрнэт-рэсурсаў фізічна размешчаная за межамі краіны, а гэта нясе рызыкі з пункту гледжання нацыянальнай бяспекі“.

На думку аўтара, для вырашэння “вышэйадзначаных праблем“ наспела “аб’ектыўная неабходнасць у стварэнні дзяржаўнай інфармацыйнай сістэмы з мэтай здзяйснення пасажырамі міжгародніх і прыгарадных “бясшвовых паездак“, якая аб’ядноўвае розныя віды транспарту“.

“У сувязі з гэтым у цяперашні час ствараецца лічбавая платформа “Разумны горад (рэгіён)“, у адным з пунктаў якой прапісана распрацоўка адзінага сервісу па браніраванні месцаў, набыцці білетаў і маніторынгу перавозак пасажыраў у Беларусі“, — адзначае Рыжкова.

Яна сцвярджае, што “рэалізацыя дадзенай ідэі з’яўляецца ключавым крокам для мадэрнізацыі і паляпшэння функцыянавання арганізацый у разгляданай сферы“, “прыўнясе значныя перавагі не толькі для кампаній, але і для іх кліентаў”.

“За кошт большай празрыстасці органам дзяржаўнага кіравання стане лягчэй прагназаваць паступленні падатковых даходаў ад удзельнікаў рынку“, — піша прадстаўнік Мінфіна. Акрамя таго, “паменшыцца верагоднасць неабгрунтаваных ільгот або ўхілення ад выплаты падаткаў”.