У Беларусь прыбыў кіраўнік МЗС Венесуэлы Іван Хіль Пінта

16 кастрычніка, Позірк. Міністр замежных спраў Венесуэлы Іван Хіль Пінта прыбыў у Беларусь, паведаміла ранкам 16 кастрычніка беларускае знешнепалітычнае ведамства.

“Насычаная праграма перагавораў” венесуэльскага дыпламата, адзначае МЗС на сваёй старонцы ў “Твітары”, пачнецца з сустрэчы з яго беларускім калегам Сяргеем Алейнікам.

11 верасня намеснік кіраўніка МЗС Яўген Шастакоў абмеркаваў з амбасадарам Венесуэлы ў Беларусі Франклінам Рамірасам Аракам (таксама з’яўляецца намеснікам міністра замежных спраў па справах Еўропы) пытанні “арганізацыі і правядзення да канца 2023 года шэрага сумесных мерапрыемстваў высокага ўзроўню”.

Найбольш вядомая старонка адносін паміж краінамі — спроба Беларусі наладкаваць пастаўкі венесуэльскай нафты на пачатку 2010-х гадоў.

Пасля скарачэння паставак расійскай нафты ў 2010 годзе Мінск пачаў шукаць альтэрнатыўных пастаўшчыкоў сыравіны для беларускіх нафтаперапрацоўчых заводаў.

Прэзідэнт Венесуэлы Уга Чавес, цяпер нябожчык, тады абяцаў Аляксандру Лукашэнку паставіць 4 млн тон нафты ў 2010 годзе і 10 млн т — у 2011-м.

Венесуэльская нафта для Мазырскага НПЗ (Гомельская вобласць) пастаўлялася танкерамі праз порт Адэсы, а далей па ўкраінскай нафтаправоднай сістэме. Для НПЗ у Наваполацку (Віцебская вобласць) сыравіна дастаўлялася танкерамі ў эстонскі порт Мууга, далей накіроўвалася па чыгунцы.

1 ліпеня 2012 года Беларусь спыніла імпарт нафты з Венесуэлы. Уладзімір Сямашка, які на той момант займаў пасаду першага намесніка прэм’ер-міністра, заявіў журналістам, што Мінску “танней нафту купляць у Расіі”. Характарызуючы праект у цэлым, чыноўнік заявіў, што “гэта была сяброўская дапамога, у пэўны момант пастаўкі былі выгадныя”.

Увесну 2023 года Беларускі расследвальніцкі цэнтр, венесуэльскае выданне Armando.Info і Цэнтр па расследаванні карупцыі і арганізаванай злачыннасці (OCCRP) выпусцілі матэрыял, у якім сцвярджалася, што Беларусь дагэтуль не аддала Венесуэле каля 1,5 млрд долараў за нафту, набытую ў 2010-х гадах.

Сёлета напрыканцы чэрвеня супрацоўніцтва і перспектывы “далейшага ўзаемадзеяння ў нафтахімічнай сферы” абмяркоўваліся на сустрэчы пасла Беларусі Андрэя Молчана з міністрам нафты Венесуэлы Педра Рафаэлем Тэлечэа.