Украіна займаецца абсталяваннем першай і другой ліній абароны на мяжы з Беларуссю
Умацаванні ў Чарнігаўскай вобласці Украіны
14 снежня, Позірк. Украіна працягвае ўмацоўваць абарончыя рубяжы на “найбольш небяспечных напрамках” на мяжы з Беларуссю, вынікае з заявы камандуючага Аб’яднанымі сіламі ўкраінскіх Узброеных сіл (АС УСУ) Сяргея Наева.
Паводле яго слоў, УСУ ўзмацняе абарону разам з Чарнігаўскай абласной ваеннай адміністрацыяй (Чарнігаўская вобласць Украіны на поўначы мяжуе з Гомельскай вобласцю Беларусі і Бранскай вобласцю РФ).
“Працы [па ўзвядзенні абарончых умацаванняў] ідуць 24/7 і будуць выкананы ў вызначаныя тэрміны. Калі будзе расці пагроза, на падрыхтаваныя рубяжы прыбудуць дадатковыя сілы, і мы будзем гатовыя адэкватна рэагаваць на любое развіццё сітуацыі”, — падкрэсліў Наеў.
Камандуючы АС УСУ адзначыў, што хоць “сёння ў Чарнігаўскай вобласці”, як і “ва ўсёй Паўночнай аперацыйнай зоне, сітуацыя стабільная і кантраляваная”, “на найбольш небяспечных напрамках поўным ходам абсталююцца межы і пазіцыі першай і другой палос абароны”.
30 кастрычніка Наеў паведаміў, што ў прыграніччы з Украінай знаходзіцца 1,8 тыс беларускіх вайскоўцаў.
Паводле яго слоў, каб апраўдаць прысутнасць вайскоўцаў у прыграніччы, Беларусь пастаянна праводзіць трэніроўкі на размешчаных там палігонах.