На навагоднім прадстаўленні з удзелам Лукашэнкі прысутнічалі дзеці з Украіны
28 снежня, Позірк. На навагоднім прадстаўленні з удзелам Аляксандра Лукашэнкі 28 снежня прысутнічалі дзеці з Украіны, вынікае з паведамлення яго прэс-службы.
“У Палацы Рэспублікі сабраліся нашы дзеці — беларускія, расійскія, украінскія, палесцінскія, латвійскія і многія іншыя”, — заявіў Лукашэнка.
Паводле яго слоў, у Беларусі “няма чужых дзяцей”. “Яны ўсе нашы, яны родныя. Беларусь была і будзе адкрытая для ўсіх, хто страціў мір у сваіх краінах. Мы аказвалі і будзем аказваць такім дзецям дапамогу. Дзецям, у якіх вайна спрабуе скрасці гэта дзяцінства”, — сказаў Лукашэнка.
Ён падкрэсліў, што “не павінна быць дзяцей, якія бягуць ад вайны”: “Мы павінны падхапіць гэтых дзетак своечасова, прывезці да сябе дадому, абагрэць і зрабіць іх дзяцінства больш шчаслівым”.
Паводле звестак Лабараторыі гуманітарных даследаванняў Ельскага ўніверсітэта (ЗША), якія ўтрымліваюцца ў апублікаванай 16 лістапада справаздачы амерыканскай некамерцыйнай арганізацыі “Абсерваторыя канфліктаў”, з Украіны ў Беларусь з пачатку развязанай РФ вайны вывезена не менш за 2.442 дзяцей 6–17 гадоў. Згодна з дакументам, дзяцей (у тым ліку з уразлівых груп насельніцтва) прывозілі ў 13 беларускіх устаноў.
У ліку датычных да перамяшчэння ўкраінскіх дзяцей у Беларусь названыя беларускі паралімпіец і праўладны грамадскі дзеяч Аляксей Талай, ААТ “Беларуськалій”, праўладны Беларускі рэспубліканскі саюз моладзі.
17 сакавіка гэтага года Міжнародны крымінальны суд у Гаазе выдаў ордэр на арышт прэзідэнта РФ Уладзіміра Пуціна і дзіцячага амбудсмена Марыі Львовай-Бяловай за вываз украінскіх дзяцей з акупаваных тэрыторый.
Беларускія дэмсілы дамагаюцца таго ж у дачыненні да Лукашэнкі. 13 верасня Еўрапейскі парламент прыняў рэзалюцыю з заклікам да МКС разгледзець магчымасць выдаць ордэр на яго арышт.
1 снежня Міжнародная федэрацыя таварыстваў Чырвонага Крыжа і Чырвонага Паўмесяца прыпыніла членства Беларускага Чырвонага Крыжа (БЧК), паколькі БЧК не вызваліў ад пасады генеральнага сакратара Дзмітрыя Шаўцова, які абвінавачваецца ў дачыненні да вывазу дзяцей з акупаваных тэрыторый Украіны.