Сям’я Юрыя Зісера пазбавілася права валодання даменамі “ТУТ БАЙ МЕДЫЯ”

29 снежня, Позірк. Сям’я заснавальніка “ТУТ БАЙ МЕДЫЯ” Юрыя Зісера (памёр 17 мая 2020 года) пазбавілася права валодання даменамі кампаніі. Пра гэта 29 снежня паведаміла на сваёй старонцы ў “Фэйсбуку” дачка Зісера Яўгена Чарняўская.

Паводле яе слоў, “КДБ адціснуў” не толькі асноўны дамен tut.by, але і “ўсе астатнія важныя (і нятанныя)” — afisha.by, jenny.by, newstut.by, rebenok.by, tutby.by.

Чарняўская падкрэсліла, што ўсе дамены “належалі маёй сям’і і кампаніі”.

“Усё адбылося за паўтара тыдня ў аднабаковым парадку без варыянтаў рашэння. Ну, то бок з варыянтам, вядома, — “з’явіцца асабіста ў офіс рэгістратара для ліквідацыі парушэнняў”. Варыянт перадаць пашпарт і адправіць чалавека з даверанасцю для зверкі пашпартных звестак, беларускім уладам не падышоў”, — адзначыла жанчына, якая цяпер жыве за мяжой.

“Яны вельмі хацелі мяне бачыць асабіста, — дадала яна. — Засумавалі! Ложак у СІЗА вызваляць, час на допыты выдзеляць у прайм-тайм”.

Чарняўская сцвярджае, што “парушэннем паслужылі раптоўна змененыя на няправільныя дадзеныя майго пашпарта (дата нараджэння) у асабістым кабінеце [правайдэра] hoster.by”.

“Пры маёй спробе змяніць іх у асабістым кабінеце на сайце хосцера, дадзеныя зноў ператвараліся ў няправільныя. Цуды нейкія! Я паспрабавала паскардзіцца службе падтрымкі. Але ніякай, уласна, падтрымкі не атрымала”, — напісала дачка Зісера.

На яе думку, hoster.by “проста паслухмяна выканаў загад” Аператыўна-аналітычнага цэнтра пры Аляксандру Лукашэнку.

Чарняўская ўдакладніла, што прэтэнзій да правайдэра ў яе няма: “Яны ў Беларусі, ім страшна, яны павінны выконваць загады ўладаў. Кат ёсць кат, ён працуе пры двары і не смее не паслухацца. Праўда, не асуджаю, сітуацыя далікатная”.

Улады разграмілі найбуйнейшы недзяржаўны інтэрнэт-партал Беларусі tut.by у траўні 2021 года. Было затрымана 15 супрацоўнікаў. Частку з іх пасля адпусцілі, памілавалі. 17 сакавіка 2023 года Мінскі гарадскі суд прыгаварыў галоўнага рэдактара Марыну Золатаву і гендырэктара “ТУТ БАЙ МЕДЫЯ” Людмілу Чэкіну да 12 гадоў пазбаўлення волі (абедзве прызнаныя палітвязнямі). Іншыя абвінавачаныя — рэдактар палітыка-эканамічнага блока Вольга Лойка, журналістка Алена Талкачова і юрысконсульт Кацярына Ткачэнка — на працэс не з’явіліся, бо пасля вызвалення з-пад варты пакінулі Беларусь. Яны абвешчаныя ў вышук.

Частка каманды tut.by, якая засталася на волі, пакінула краіну і ў ліпені 2021 года стварыла праект “Люстэрка”, які ў асноўным працягвае традыцыі tut.by. У Беларусі і Расіі доступ да сайта заблакаваны.

Hoster.by з’яўляецца адным з праектаў Зісера. Кампанія працягвае працу ў Беларусі.

У лістападзе hoster.by стаў арганізатарам форуму ў Мінску па кіраванні інтэрнэтам Belarus IGF, які з’яўляецца часткай глабальнага Internet Governance Forum, які праводзіцца па ўсім свеце пад эгідай ААН з 2006 года. Правайдэр атрымаў падтрымку Міністэрства сувязі і інфарматызацыі і Міністэрства інфармацыі.

Генеральны дырэктар ТАА “Надзейныя праграмы” (брэнд Нoster.by) Сяргей Павалішаў фігураваў у “справе tut.by”, знаходзіўся пад вартай з мая па верасень 2021 года, у красавіку 2022-га быў памілаваны.