Фонд спартыўнай салідарнасці заклікаў беларускіх атлетаў пазбягаць спаборніцтваў у Расіі

8 студзеня, Позірк. “Па магчымасці пазбягаць удзелу ў спаборніцтвах і зборах у Расійскай Федэрацыі” заклікаў айчынных атлетаў Беларускі фонд спартыўнай салідарнасці (БФСС).

Заява фонду апублікаваная 8 студзеня ў яго тэлеграм-канале.

На думку арганізацыі, сённяшняя Расія з’яўляецца “максімальна таксічнай дзяржавай ва ўсім свеце”, таму для вяртання “ў еўрапейскую і сусветную сістэму спорту” беларускім спартсменам “пажадана мінімізаваць кантакты з расійскімі калегамі”.

“У гэты ж самы час рэкамендуецца пачаць аднаўляць нефармальныя кантакты з еўрапейскімі і асабліва ўкраінскімі калегамі. Прадстаўнікі ўсіх відаў спорту маюць ва Украіне калег і сяброў. Пачніце мець зносіны”, — гаворыцца ў заяве БФСС.

Пры гэтым, калі ўхіліцца ад удзелу ў спаборніцтвах на тэрыторыі РФ магчымасці няма, фонд рэкамендуе “выкарыстоўваць усе магчымасці для пашырэння матэрыяльна-тэхнічнай базы вашай арганізацыі, эканоміі сродкаў беларускіх падаткаплацельшчыкаў, павышэння ўзроўню спартыўнага майстэрства за кошт бюджэту Расійскай Федэрацыі”.

Адзначаючы, што Беларусь “становіцца на шлях палітычнага транзіту”, што “можа прывесці да новай крытычнай сітуацыі ў спартыўнай сістэме”, БФСС таксама заклікаў чыноўнікаў ад спорту “максімальна захаваць матэрыяльна-тэхнічную базу спартыўных арганізацый і цэнтраў”.

“Пры магчымасці варта не адкладаць закупкі новага спартыўнага абсталявання, правядзення рамонту і аднаўлення спартыўных баз і цэнтраў. Такія меры змогуць адцягнуць заняпад спартыўнай інфраструктуры на пэўны час”, — гаворыцца ў рэкамендацыях.

28 лютага 2022 года, неўзабаве пасля падтрыманага афіцыйным Мінскам уварвання РФ ва Украіну, Міжнародны алімпійскі камітэт (МАК) заклікаў міжнародныя спартыўныя федэрацыі не дапускаць да спаборніцтваў атлетаў з Расіі і Беларусі. Гэтая рэкамендацыя была неадкладна і масава прынятая да выканання.

28 сакавіка МАК выпусціў заяву, у якой рэкамендаваў міжнародным федэрацыям у відах спорту дазволіць беларусам і расіянам удзельнічаць у міжнародных спаборніцтвах.

Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзеючых кантрактаў з сілавымі і ваеннымі ведамствамі сваіх краін.

8 снежня 2023 года МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях 2024 года ў Парыжы ў нейтральным статусе.