Белстат: Сельгасвытворчасць у 2023 годзе вырасла на 1,1%

15 студзеня, Позірк. Вытворчасць прадукцыі ў гаспадарках усіх катэгорый (сельгасарганізацый, фермерскіх, насельніцтва) у 2023 годзе ў бягучых цэнах склала 33,1 млрд рублёў, што ў супастаўных цэнах на 1,1% больш, чым за аналагічны перыяд 2022-га, паведамляе Нацыянальны статыстычны камітэт.

У гаспадарках усіх катэгорый выраблена жывёлы і птушкі (у жывой вазе) 1.781 тыс. тон (1.734,9 тыс.; +2,7%), малака — 8.331,2 тыс. тон (7.869,1 тыс.; +5,9%), яек атрымана 3.438,8 млн штук (3.466,3 млн; -0,8%).

Валавы збор збожжавых і зернебабовых культур склаў 7,7 млн тон (8,7 млн; -11,5%), рапсу — 0,9 млн (0,8 млн; +12,5%), бульбы — 4 млн тон (3,9 млн; +2,6%), гародніны — 2,8 млн (2,9 млн; -3,4%), цукровых буракоў — 4,8 млн тон (4,2 млн; +14,3%).

Найбольшую ўдзельную вагу ў агульным аб’ёме вытворчасці прадукцыі сельскай гаспадаркі займаюць Мінская (26,6%) і Брэсцкая (22,5%) вобласці, далей ідуць Гродзенская (17,3%), Гомельская (12,2%), Віцебская (10,8%) і Магілёўская (10,5%).

У сельгасарганізацыях выраблена прадукцыі на 26,8 млрд рублёў, што ў супастаўных цэнах на 2,2% больш, чым за той жа леташні перыяд.

На долю сельскахазарганізацый прыпадае 97,1% рэспубліканскага аб’ёму вытворчасці жывёлы і птушкі (у жывой вазе), малака — 97,7%, яек — 85,2%, збожжа — 94,6%, рапсу — 96%, цукровых буракоў — 97,8%, бульбы — 14,4% і гародніны — 5,9%.

У 2022 годзе, паводле дадзеных Белстата, вытворчасць у галіне ў бягучых цэнах склала 31,8 млрд рублёў (+3,6% у параўнанні з 2021 годам).