Ірландыя выступіла за ўзмацненне санкцый супраць рэжыму Лукашэнкі — Латушка

28 студзеня, Позірк. Урад Ірландыі выступіў “з выразнай пазіцыяй аб важнасці ўзмацнення санкцыйнага ціску на рэжым Лукашэнкі і гарманізацыі санкцый у дачыненні да Мінска і Расіі”, паведаміў 28 студзеня ў сваім тэлеграм-канале намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.

Паводле яго слоў, прапановы “па гарманізацыі і ўзмацненню санкцый” былі адпраўленыя НАУ і АПК у Міністэрства замежных спраў краін Еўрасаюза.

Кіраўнік знешнепалітычнага ведамства Ірландыі Міхол Марцін у лісце ў адказ запэўніў, што яго дзяржава “паслядоўна падтрымлівае жорсткія санкцыі супраць рэжыму Лукашэнкі”, а таксама “эфектыўную рэалізацыю мер па барацьбе з іх абыходам”, адзначыў Латушка.

Марцін таксама падкрэсліў, што “Ірландыя падтрымлівае дэмакратычную будучыню Беларусі і працягне працаваць з партнёрамі з ЕС, каб забяспечыць падтрымку будучай, дэмакратычнай Беларусі, якая застанецца рашучай і эфектыўнай”.

У лісце міністра замежных спраў Ірландыі адзначаецца важнасць “такога інструмента ўзаемадзеяння еўрапейскіх структур з беларускай грамадзянскай супольнасцю як Кансультатыўная група ЕС”, дадаў кіраўнік НАУ.

Латушка нагадаў, што цяпер пад санкцыямі Еўрасаюза знаходзяцца 233 фізічныя і 37 юрыдычных асоб Беларусі.

Заходнія санкцыі (Еўрасаюза, ЗША, іншых дзяржаў) уведзеныя праз фальсіфікацыю прэзідэнцкіх выбараў 9 жніўня 2020 года і ўзмоцненыя пасля інцыдэнту 23 траўня 2021 года, калі ўлады прымусілі прызямліцца ў Мінску самалёт авіякампаніі Ryanair з беларускімі апазіцыянерамі на борце, які ляцеў з Афін у Вільнюс. Пазней санкцыі былі пашыраныя праз саўдзел у расійскай агрэсіі супраць Украіны.

У прыватнасці, ЕС увёў восем санкцыйных пакетаў супраць афіцыйнага Мінска. Таксама грамадзяне Беларусі і арганізацыі згадваюцца ў санкцыйных дакументах супраць РФ.

Прадстаўнікі найбуйнейшых дэмакратычных сіл (Аб’яднаны пераходны кабінет, офіс дэмлідара Святланы Ціханоўскай, Народнае антыкрызіснае ўпраўленне) падтрымліваюць санкцыі і неаднаразова заклікалі міжнародную супольнасць і заходніх саюзнікаў узмацніць праз іх ціск на рэжым Лукашэнкі.

Гл. таксама:

ПАСЕ заклікала да санкцый супраць Беларусі і РФ за дэпартацыю ўкраінскіх дзяцей

Пазьняк: Эканоміка мацнейшая за палітыку, санкцыі — поўны пшык