22 лютага, Позірк. Чэхія ўвяла бестэрміновую забарону на выдачу віз і відаў на жыхарства грамадзянам Расіі і Беларусі, паведамляе партал České noviny са спасылкай на прэм’ер-міністра краіны Пятра Фіялу.
Адначасова, паводле яго слоў, неабходна стварыць умовы для прадстаўнікоў апазіцыі і студэнтаў, якія “не хочуць мець нічога агульнага з дадзенымі рэжымамі, каб яны маглі вучыцца, працаваць <…> на тэрыторыі Чэхіі”.
“У правілы ўключаны шэраг выключэнняў, але мы працягнем над гэтым працаваць”, — дадаў Фіяла.
Пра тое, што МЗС Чэхіі выступіла за працяг дзеяння забароны на выдачу нацыянальных віз і відаў на жыхарства грамадзянам Беларусі і РФ, паведаміў партал forum24.cz 12 лютага.
Першапачатковая забарона, якая дзейнічае да 31 сакавіка 2024 года, была ўведзена пасля пачатку вайны ва Украіне.
Новая пастанова ўрада знешнепалітычнае ведамства прапанавала зрабіць бестэрміновым.
Іншаземцы, якія ўжо маюць від на жыхарства, не з’яўляюцца мэтавай групай дакумента.
Палажэнне, як паведамлялася, таксама не будзе распаўсюджвацца на заявы на атрыманне кароткатэрміновых віз, калі заяўнік з’яўляецца членам сям’і грамадзяніна Чэхіі або грамадзяніна Еўрасаюза, якога ён суправаджае або ідзе за ім. Гэта таксама не датычыцца запытаў на візу, доўгатэрміновы або пастаянны від на жыхарства, калі знаходжанне заяўніка адпавядае інтарэсам Чэхіі і пацверджана міністрам замежных спраў.
Акрамя таго, пастанова не павінна распаўсюджвацца на запыты на атрыманне доўгатэрміновага віду на жыхарства, калі заяўнік з’яўляецца членам сям’і замежніка, які мае від на жыхарства ў Чэшскай Рэспубліцы. Ад забароны таксама вызвалены беларусы, якія падаюць заяву на атрыманне ВНЖ з мэтай навучання ў ВНУ на аснове стыпендый, прадстаўленых Чэхіяй, ЕС ці міжнароднымі арганізацыямі.
