АПК прадставіў навігатар па Канцэпцыі кампенсацыі шкоды рэпрэсаваным

20 кастрычніка, Позірк. Навігатар па Канцэпцыі кампенсацыі шкоды рэпрэсаваным прадстаўлены 20 кастрычніка ў тэлеграм-канале Аб’яднанага пераходнага кабінета.

Спасылкі навігатара вядуць на старонку дэмакратычнага лідара Святланы Ціханоўскай, па якіх можна знайсці адказы на асноўныя пытанні, узнятыя ў дакуменце.

У прыватнасці, ёсць магчымасць даведацца, хто можа разлічваць на кампенсацыю шкоды і рэабілітацыю, хто і як будзе вызвалены з месцаў зняволення ў транзітны перыяд, якія формы кампенсацыі шкоды прадугледжаныя ў канцэпцыі, якія функцыі будзе выконваць Камісія па аднаўленні справядлівасці, што будзе з канфіскаванай маёмасцю беларусаў, як будзе кампенсавацца шкода рэпрэсаваным студэнтам і рабочым, звольненым па палітычных матывах.

Праект Канцэпцыі кампенсацыі шкоды рэпрэсаваным прадугледжвае рэабілітацыю і аднаўленне ў юрыдычных, грамадзянскіх, палітычных, працоўных і іншых правах тых, хто пацярпеў ад дзеянняў рэжыму Аляксандра Лукашэнкі з 20 ліпеня 1994 года, калі ён заняў пасаду прэзідэнта.

Дакумент, апублікаваны 25 верасня, распрацаваны офісам Святланы Ціханоўскай у супрацоўніцтве з праваабарончымі арганізацыямі, НДА, юрыстамі і былымі адвакатамі. У праекце канцэпцыі прапануецца стварыць камісію па аднаўленні справядлівасці — “часовы пазасудовы калегіяльны орган, які складаецца з ліку службовых асоб Беларусі”.

Асобныя палажэнні дакумента былі разгледжаны ў інтэрв’ю “Позірку” дарадцы Ціханоўскай па прававых пытаннях Крысціны Рыхтэр.