Яўка на выбарах склала амаль 73% — ЦВК
25 лютага, Позірк. Яўка на выбарах у Палату прадстаўнікоў Нацыянальнага сходу (ПП НС) і мясцовыя саветы дэпутатаў склала 72,98%, паведаміла Цэнтральная выбарчая камісія.
Галасаванне завяршылася ў 20 гадзін.
Сцвярджаецца, што ў Магілёўскай вобласці прагаласавала 77,03% выбаршчыкаў (на 9 гадзін яўка складала — 54,72%, на 12 — 59,67%, на 14 — 66,52%, на 16 — 71,3%, на 18 — 75,11%), Гродзенскай— 76,9% (40,85%, 48,68%, 57,64%, 64,48%, 70,56%), Гомельскай— 75,85% (51,63%, 58,49%, 67,09%, 70,74%, 74,13%), Брэсцкай — 75,82% (46,33%, 53,12%, 61,85%, 69,29%, 74,79%), Віцебскай — 74,74% (43,28%, 51,52%, 60,31%, 67,24%, 72,61%), Мінскай — 74,2% (42,58%, 48,91%, 56,97%, 61,13%, 70,27%), Мінску — 61,54% (31,08%, 40,64%, 48,23%, 54,9%, 59,09%).
Па выніках датэрміновага галасавання ЦВК заяўляў аб рэкорднай яўцы выбаршчыкаў — 41,71%: Гомельская вобласць — 49,93%, Магілёўская — 49,43%, Брэсцкая — 44,72%, Віцебская — 41,71%, Мінская — 40,47%, Гродзенская — 39,98%, Мінск — 30,07%.
Папярэднія вынікі выбараў ЦВК абяцае паведаміць 26 лютага ў 14.00.
Сёлета ўпершыню ў Беларусі прайшлі аб’яднаныя выбары ў ПП НС і мясцовыя саветы дэпутатаў — адзіны дзень галасавання быў прызначаны на 25 лютага.
Назіраць за выбарамі былі запрошаны прадстаўнікі СНД, Парламенцкай асамблеі АДКБ. Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе (БДІПЧ АБСЕ) запрашэння не атрымала.
Электаральная кампанія праходзіла на фоне маштабных рэпрэсій і зачысткі палітычнага поля ад апазіцыі. У якасці кандыдатаў у дэпутаты былі зарэгістраваныя толькі прыхільнікі Аляксандра Лукашэнкі.
Гл. таксама:
ЗША заявілі аб непрызнанні парламенцкіх выбараў у Беларусі (дапоўнена)
Латушка: Беларусы не пайшлі на выбары, выбарчыя ўчасткі пустуюць