МУС Латвіі прапанавала аднавіць узмоцнены рэжым аховы мяжы з Беларуссю

7 сакавіка, Позірк. У сувязі з тым, што паток нелегальных мігрантаў аднавіўся, Міністэрства ўнутраных спраў Латвіі прапанавала зноў увесці узмоцнены рэжым аховы мяжы з Беларуссю, паведаміў партал LSM.

У падрыхтаваным МУС праекце распараджэння адзначаецца, што ўзмоцнены рэжым аховы мяжы будзе дзейнічаць з 13 сакавіка да 12 верасня 2024 года. Плануецца аднавіць узмоцнены рэжым у Лудзенскім краі, Краслаўскім, Аўгшдаўгаўскім, Даўгаўпілсе і Каўнацкай воласці Рэзекненскага краю.

Ва ўмовах узмоцненага рэжыму Дзяржаўная паліцыя і Нацыянальныя ўзброеныя сілы будуць аказваць неабходную падтрымку Памежнай ахове.

10 лютага Кабмін Латвіі прыняў рашэнне не аднаўляць узмоцнены рэжым памежнага кантролю на мяжы ў сувязі з “паспяховымі намаганнямі па скарачэнні колькасці спробаў незаконнага перасячэння мяжы”.

У апошнія тыдні колькасць спробаў незаконнага перасячэння мяжы зноў вырасла. 5 сакавіка Дзяржаўная памежная служба Латвіі прадухіліла 28 такіх спробаў (за дзень да гэтага — 13) — сутачны рэкорд для гэтай балтыйскай дзяржавы ў 2024 годзе.

У 2023-м годзе Латвія спыніла 13.863 спробы незаконнага перасячэння мяжы, у 2022-м — 5.026.

Статыстыка, выведзеная “Позіркам” на падставе штодзённых звестак, сведчыць, што напружанасць на мяжы Беларусі і ЕС вагаецца. Да канца 2023 года і ў студзені 2024-га яна прыкметна знізілася, у лютым зноў пачала ўзрастаць.

Міграцыйны крызіс на мяжы Беларусі і краін ЕС працягваецца з вясны 2021 года.