Лукашэнка памілаваў 15 асуджаных, у тым ліку 9 жанчын
Зняволеныя ў Бабруйску
13 сакавіка, Позірк. Указ аб памілаванні 15 асуджаных, у тым ліку 9 жанчын, падпісаў 13 сакавіка Аляксандр Лукашэнка, паведамляе неафіцыйны тэлеграм-канал яго прэс-службы.
Адзначаецца, што 11 з іх здзейснілі злачынствы, будучы непаўналетнімі.
Частцы памілаваных пакаранне замененае на мякчэйшае, астатнім скарочаны неадбыты тэрмін.
Адзначаецца, што адпаведныя прапановы ўнесла камісія па пытаннях памілавання і вызвалення ад крымінальнай адказнасці “на выкананне даручэння” Лукашэнкі.
Ці маюцца сярод памілаваных палітвязні, невядома.
Раней улады абмяркоўвалі магчымасць правядзення амністыі, прымеркаванай да 80-годдзя вызвалення Беларусі ад нямецка-фашысцкіх захопнікаў.
На нарадзе па асобных пытаннях удасканалення заканадаўства аб крымінальнай адказнасці 11 студзеня Лукашэнка заявіў: “Трэба будзе больш уважліва паглядзець на жанчын і дзяцей, на жанчын з дзецьмі, іншыя катэгорыі асуджаных”. Звяртаючыся да міністра ўнутраных спраў Івана Кубракова, ён даручыў “звярнуць увагу на недахопы папярэдніх амністый, каб іх не паўтарыць”.
13 студзеня Кубракоў паведаміў у эфіры беларускага тэлебачання, што МУС выступіла з “адназначнай прапановай” — не прымяняць магчымую амністыю 2024 года ў дачыненні да “асоб, што асуджаныя за экстрэмізм і тэрарызм” (так улады ў апошнія гады кваліфікуюць “палітычныя” справы).
Міністр заявіў, што “шанцаў было дадзена вельмі шмат, пачынаючы ад заявы — звярнуцца да кіраўніка дзяржавы аб памілаванні”, а “самае галоўнае ў рашэнні па прымяненні амністыі, каб людзі ўсвядомілі, што яны здзейснілі, і выправіліся”. Пры гэтым ён дапусціў прымяненне амністыі да асуджаных за “экстрэмізм”, калі “чалавек раскаяўся”.
Папярэдні акт амністыі быў прымеркаваны да “Дня народнага адзінства”. Адпаведны дакумент быў прыняты напрыканцы 2022 года, дзейнічаў да 10 чэрвеня 2023 года. Яшчэ на этапе абмеркавання чыноўнікі далі зразумець, што амністыя не закране асуджаных з палітычных матываў.
