Галоўчанка: У заходніх палітыкаў страчана рэальнасць успрымання падзей

15 сакавіка, Позірк. Каментар міністра замежных спраў Літвы аб рашэннях беларускіх уладаў сведчыць аб тым, што “людзі наогул не разумеюць, пра што яны гавораць”, заявіў 15 сакавіка дзяржСМІ прэм’ер-міністр Раман Галоўчанка.

“Выказванні заходніх палітыкаў, у тым ліку з суседніх з намі краін”, гавораць аб тым, што ў іх “згублена рэальнасць успрымання падзей”, лічыць ён.

Паводле сцвярджэння Галоўчанкі, імпарт забароненай да ўвозу ў Беларусь літоўскай прадукцыі складае каля 5-6 мільёнаў долараў за год і яе страта “абсалютна ніяк не адаб’ецца на нашай эканоміцы і спажывецкім рынку”.

На думку прэм’ера, больш важнай з’яўляецца пастанова, якая “ўводзіць абмежаванне на пастаўкі прамысловых партый тавараў, якіх летась у Беларусь было ўвезена на суму 150 млн долараў агульнай вагой каля 60 тыс. тон”. Але гэтыя грузы, лічыць Галоўчанка, трапяць да нас “па іншым лагістычным маршруце” — праз Латвію і Польшчу.

Галоўчанка пацвердзіў, што ўчарашнія рашэнні ўрада сталі адказам на закрыццё літоўскім бокам з 1 лютага двух пунктаў пропуску на мяжы з Беларуссю. Пры гэтым сыход значных партый тавараў з мяжы з прычыны згаданых дзеянняў, на думку прэм’ера, зменшыць чэргі на мяжы, і пры гэтым яна будзе перасякацца толькі “з тымі таварамі, якія нам сапраўды патрэбныя”.

Таксама, заявіў Галоўчанка, у існуючай сітуацыі “ўскосна пацерпіць літоўскі бізнес”, асабліва лагістычныя цэнтры.

14 сакавіка беларускі ўрад паведаміў, што праз пункты пропуску на беларуска-літоўскай мяжы забаронена перавозіць “вады, піва, віны, сусла вінаграднае, вермуты, іншыя напоі зброджаныя, спірт этылавы, воцат, шыны і пакрышкі пнеўматычныя гумовыя, адзенне і іншыя вырабы, ва ўжыванні, а таксама былыя ва ўжыванні часткі і прыналежнасці транспартных сродкаў”. Краіна паходжання значэння не мае.

Таксама ўводзіцца забарона на ўвоз асобнай прадукцыі літоўскай вытворчасці, у прыватнасці “малаку і вяршкоў згушчанай, садавіны і арэхаў, кавы, сокаў фруктовых, вод, воцату, калгот, панчох, гольфаў, шкарпэтак і іншых панчошна-шкарпэтачных вырабаў, асобных будаўнічых вырабаў, халадзільнікаў. і маразільнікаў”. Адпаведныя змяненні ўнесены ў пастанову ўрада ад 6 снежня 2021 года № 700 “Аб прымяненні спецыяльных мер адносна асобных відаў тавараў”.

Паведамляецца, што гэтыя меры прыняты ў адказ на дзеянні ўрада Літвы, які з 1 сакавіка закрыў пагранічныя пераходы Лаварышкес (з беларускага боку Катлоўка) і Райгардас (Прывалка).

Забараніўшы ўвоз з Літвы шэрагу тавараў, беларускія ўлады “ўвялі санкцыі супраць саміх сябе і ўласнага народа”, заявіў інфармагенцтву BNS 15 сакавіка міністр замежных спраў гэтай балтыйскай дзяржавы Габрыэлюс Ландсбергіс.

“Яны вырашылі адмовіцца ад прадуктаў, якія ім, верагодна, патрэбныя больш за ўсё. Насамрэч гэтыя аб’ёмы з Літвы не вельмі вялікія <…>. Але кошты на гэтую прадукцыю [цяпер] усё роўна будуць расці, яе будзе яшчэ менш”, — сказаў кіраўнік МЗС.

(Выкарыстаны матэрыялы прэс-службы Саўміна.)