Мінінфарм асудзіў рашэнне Латвіі заблакаваць доступ да двух беларускіх дзяржСМІ
19 сакавіка, Позірк. Міністэрства інфармацыі асудзіла рашэнне Нацыянальнага савета па электронных СМІ Латвіі (NEPLP) заблакаваць доступ да рэсурсаў шэрагу СМІ, у ліку якіх некалькі беларускіх дзяржаўных.
“Рашэнне пра закрыццё доступу да сайтаў беларускага тэлеканала АНТ і выдавецкага дому “СБ. Беларусь сегодня” Мінінфарм расцэньвае як недапушчальныя дзеянні, скіраваныя на абмежаванне свабоды слова і мэтанакіраванае пазбаўленне латышскіх грамадзян права на атрыманне поўнай і аб’ектыўнай інфармацыі”, — заявіла міністэрства 19 сакавіка.
Напярэдадні стала вядома, што NEPLP заблакаваў доступ да дзевяці сайтаў, у тым ліку вышэйзгаданых беларускіх дзяржСМІ праз тое таго, што яны выкарыстоўваюцца “для падтрымкі агрэсіўнай расійскай прапаганды”. Яны публікуюць “скажоную і ілжывую інфармацыю пра вайну Расіі супраць Украіны, пра ваенныя злачынствы, здзейсненыя Расіяй, з мэтай іх апраўдання”, распаўсюджваюць “ненавісніцкія выказванні і інфармацыю, якая дыскрэдытуе Латвію і НАТО”.
NEPLP лічыць, што дэзінфармацыя на гэтых сайтах “можа прывесці да ўзнікнення і актывізацыі арганізацый, якія падтрымліваюць радыкальныя ідэі, а таксама іх праціўнікаў”, што ў выніку здольна негатыўна паўплываць на бяспеку людзей і дзяржавы.
У Беларусі практычна не засталося незалежных грамадска-палітычных СМІ. Многія рэдакцыі пасля разгрому (вобшукі, канфіскацыя тэхнікі, арышты, блакаванне) альбо закрыліся, альбо працуюць за мяжой. Некаторыя незалежныя інтэрнэт-СМІ, якія засталіся ў краіне, у інтарэсах бяспекі пераключыліся на бытавыя тэмы.
Паводле даных Беларускай асацыяцыі журналістаў (БАЖ), за кратамі знаходзяцца 34 прадстаўнікі мас-медыя. БАЖ, у якую ўваходзяць супрацоўнікі недзяржаўных СМІ, дэ-юрэ ліквідаваная ўладамі, працуе за мяжой.
