Музыкі ў Польшчы заклікалі адпраўляць нотныя запісы ў калонію Калеснікавай
19 сакавіка, Позірк. У Польшчы стартавала акцыя салідарнасці “Музычныя партытуры для Марыі Калеснікавай”, арганізаваная беларускім музыказнаўцам, збіральніцай і выканаўцай фальклору Настай Някрасавай і выкладчыцай Інстытута музыкалогіі Варшаўскага ўніверсітэта, доктарам Катажынай Наліваек.
На старонцы акцыі ў “Фэйсбуку” прапануецца адпраўляць у бібліятэку гомельскай папраўчай калоніі №4, дзе адбывае тэрмін палітзняволеная, нотныя запісы.
“Чаму ноты? У адным з лістоў Марыя напісала, што сумуе па музыцы, і папрасіла даслаць ёй ноты, таму што тады яна зможа прадставіць [музыку] у галаве, — адзначаюць ініцыятары акцыі. — Мы ведаем, што Марыі не дазваляюць граць на [музычным] інструменце, ёй нельга перадаць пасылкі, або пералічыць грошы. Гэты жэст салідарнасці змяняе сітуацыю!”
Някрасава і Наліваек прапануюць наступныя дзеянні: выбраць любы нотны запіс (набыты, альбо з тых, што “ёсць у вас дома”), “сфатаграфаваць вокладку і канверт з адрасам” і апублікаваць у сацыяльных сетках, а таксама адправіць ноты па адрасе 246035, Гомель, вул. Антошкіна, 3, ВК № 4, Марыі Калеснікавай.
Калеснікава была спікерам штаба былога старшыні праўлення “Белгазпрамбанка” Віктара Бабарыкі на прэзідэнцкіх выбарах 2020 года. Пасля затрымання экс-банкіра далучылася да каманды Ціханоўскай, стаўшы адной з прадстаўніц аб’яднанага штаба разам з Веранікай Цапкала, жонкай яшчэ аднаго прэтэндэнта на прэзідэнцкую пасаду Валерыя Цапкалы.
7 верасня 2020 года яе затрымалі і наступнай ноччу даставілі на мяжу з Украінай. Калеснікава адмовілася пакінуць краіну і парвала свой пашпарт. Пасля гэтага яе змясцілі ў следчы ізалятар. 6 верасня 2021 года палітзняволеную прыгаварылі да 11 гадоў калоніі па абвінавачванні ў змове з мэтай захопу ўлады неканстытуцыйным шляхам.
У лістападзе 2022 года Калеснікаву экстранна прааперавалі ў Гомельскай гарадской клінічнай бальніцы хуткай медыцынскай дапамогі, куды яе даставілі ў цяжкім стане. У яе дыягнаставалі перытаніт (запаленне брушыны), які стаў ускладненнем прабадной язвы.
З-за інфармацыйнай блакады, якую ладзіць адміністрацыя калоніі, інфармацыі аб яе стане практычна няма.
Калеснікава з 17 гадоў выкладала флейту ў гімназіі ў Мінску. Грала ў Оперным тэатры, Нацыянальным акадэмічным канцэртным аркестры Рэспублікі Беларусь пад упраўленнем Міхаіла Фінберга, у Прэзідэнцкім аркестры Рэспублікі Беларусь. Актыўна гастралявала ў Італіі, Літве і Польшчы. У 2007 годзе пераехала ў Германію, паступіўшы ў Вышэйшую школу музыкі ў Штутгарце. Прайшла навучанне на двух факультэтах-старадаўняй і сучаснай музыкі.
У 2010-х гадах вяла актыўную канцэртную дзейнасць і арганізоўвала міжнародныя культурныя праекты ў Германіі і Беларусі.