3 красавіка, Позірк. Аб’ём інвестыцый у ініцыятывы праграмы “Адзін раён — адзін праект” на 2024 год складае каля 1,5 млрд рублёў (каля 460 млн долараў) — на 500 млн рублёў больш, чым у 2023-м, заявіў тэлеканалу “РТР-Беларусь” намеснік начальніка галоўнага ўпраўлення інвестыцыйнай і будаўнічай дзейнасці Мінэканомікі Дзмітрый Клімянкоў.
Паводле яго слоў, усяго цяпер гэтая праграма налічвае 190 ініцыятыў, якія патрабуюць укладання 8 млрд рублёў (каля 2,5 млрд долараў), у выніку рэалізацыі якіх будзе створана больш за 9,5 тыс. працоўных месцаў.
Сёлета, паведаміў Клімянкоў, плануецца завяршыць “больш за 50 праектаў” з гэтага спісу. “Напрыклад, на Барысаўскім заводзе аўтатрактарнага электраабсталявання будзе асвоена вытворчасць новага пакалення вырабаў для перспектыўных рухавікоў; у Вілейскім і Мядзельскім раёнах — асобных відаў элітных сыроў з блакітнай і белай цвіллю і іншых відаў харчовай прадукцыі”, — адзначыў чыноўнік.
Працягнецца рэалізацыя “значных для краіны праектаў” — па будаўніцтве агрэгата для выпуску карбаміду на прадпрыемстве “Гродна Азот”, цэха па вытворчасці паперы на Светлагорскім цэлюлозна-кардонным камбінаце, новага цэха “сухога дзіцячага харчавання па стандартах GMP” на “Беллакце”, заявіў Клімянкоў.
Прадстаўнік Мінэканомікі сцвярджае, што летась завяршылася рэалізацыя 19 праектаў, было створана больш за 3,5 тыс. новых працоўных месцаў. Разам з тым у сярэдзіне лютага ведамства, рапартуючы пра завяршэнне такой жа колькасці праектаў у 2023 годзе, заявіла, што створана 1.118 працоўных месцаў.
У траўні 2022 года Лукашэнка заявіў, што кожнаму раёну краіны “патрэбны адзін нармальны праект на год”. “Вялікі, малы, але каб людзі бачылі нейкі рух і атрымалі працоўныя месцы”, — запатрабаваў ён. Праз год стала вядома, што ў рамках гэтага даручэння падрыхтавана 129 праектаў (верагодна, па колькасці адміністрацыйных адзінак — 118 раёнаў, 10 гарадоў абласнога падпарадкавання і сталіца).
У большай ступені рэалізацыя ініцыятывы “ажыццяўляецца адміністрацыйнымі метадамі”, заявіла ў інтэрв’ю “Позірку” старшы эксперт даследчага цэнтра Beroc Анастасія Лузгіна.
“Вядома, нельга казаць, што дэфіцыт працоўнай сілы існуе ў абсалютна ўсіх рэгіёнах краіны. Ёсць, зразумела, раёны, дзе людзі з розных прычын сапраўды не могуць знайсці працу. І недзе стварэнне новага прадпрыемства можа даць штуршок развіццю, але гэта павінна рабіцца не зверху ўніз, а наадварот. Не для галачкі, а з пункту гледжання рацыянальнасці”, — падкрэсліла эксперт.
Адток кадраў з некаторых раёнаў яна тлумачыць адсутнасцю адпаведнай інфраструктуры: “Людзі, асабліва маладыя, з’язджаюць з пасёлкаў і вёсак у гарады, таму што там камфортней жыць, ёсць магчымасць атрымліваць больш высокі заробак”.
Пры гэтым для многіх найбольш прывабным месцам для працы і жыцця застаецца Мінск, дзе “магчымасці вышэйшыя, чым нават у абласных цэнтрах”, канстатавала Лузгіна.
