10 красавіка, Позірк. Праблемы, з якімі сутыкаюцца грамадзяне Беларусі, што пражываюць на Кіпры, былі абмеркаваныя падчас сустрэчы дэмакратычнага лідара Святланы Ціханоўскай з прадстаўнікамі дыяспары.
Як паведаміла прэс-служба палітыка, на сустрэчы падымаліся пытанні легалізацыі “для ўсіх тыпаў віду на жыхарства”, атрыманне віз, неабходнасць прадастаўлення даведак аб несудзімасці і шлюбе, складанасці з адкрыццём банкаўскіх рахункаў, адсутнасць “пашпарта замежніка”, непрызнанне беларускіх правоў кіроўцы, адсутнасць афіцыйнага беларускага дыппрадстаўніцтва і інш.
Было адзначана, што “народная амбасада” актыўна працуе на Кіпры і спрабуе дапамагчы суайчыннікам з рашэннем праблем.
Падчас праведзеных 10 красавіка сустрэч з кіраўніцтвам Рэспублікі Кіпр (прэзідэнтам, спікерам і членамі парламента) Ціханоўская звярнулася па садзейнічанне ў вырашэнні ўзнятых беларускай дыяспарай пытанняў.
