У Беларусі самыя павольныя ў ЕАЭС тэмпы росту ВУП — ЕАБР
12 красавіка, Позірк. Па выніках студзеня — лютага 2024 года Беларусь заняла апошняе месца па росце ВУП сярод краін, якія ўваходзяць у зону аперацый Еўразійскага банка развіцця, сведчыць даныя макраагляду аналітыкаў ЕАБР, распаўсюджанага 12 красавіка.
На фоне “няпростай знешнеэканамічнай сітуацыі” рэгіён банка “працягвае дэманстраваць упэўнены рост”, гаворыцца ў дакуменце.
Адзначаецца, што ў студзені — лютым 2024 года эканамічная актыўнасць у Арменіі паскорыліся да 13,6% (тут і далей у гадавым вымярэнні) дзякуючы “дынамічнаму павелічэнню выпуску ў прамысловым сектары”.
“Эканоміка Беларусі вырасла на 4%, чаму, сярод іншага, спрыялі рост прамысловай вытворчасці і рознічнага тавараабароту”, — гаворыцца ў аглядзе.
Драйверам росту эканомікі Казахстана на 4,2% сталі інвестыцыі ў асноўны капітал.
Тэмпы росту ВУП Кыргызстана павысіліся да 8,6%, чаму шмат у чым спрыяла “актывізацыя інвестыцыйнай дзейнасці, тэмпы росту якой паскорыліся да 55%”.
Прамысловая вытворчасць у Расіі “застаецца ключавым драйверам росту эканомікі”, па выніках першых двух месяцаў прырост ВУП РФ склаў 6%.
У Таджыкістане (не ўваходзіць у склад Еўразійскага эканамічнага саюза. — “Позірк”.) захоўваюцца высокія тэмпы росту “на фоне моцнага ўнутранага попыту, у частцы як спажывання, так і інвестыцый”.
“Унутраны попыт у краінах стымулюецца нацыянальнымі праектамі, такімі як павелічэнне дзяржаўных капіталаўкладанняў у Арменіі, праграмамі імпартазамяшчэння ў Беларусі і Расіі, развіццём машынабудаўнічай галіны ў Казахстане, энэргетыкі — у Кыргызстане і Таджыкістане”, — гаворыцца ў аглядзе.
На думку аналітыкаў ЕАБР, якая складваецца дынаміка ўнутранага попыту стварае ўмовы для “далейшага развіцця вытворчасці і паглыблення спецыялізацыі эканомік”, а пашырэнне рэгіянальнага эканамічнага супрацоўніцтва будзе спрыяць “паскоранаму развіццю галін, павялічваючы прадукцыйнасць рэгіёну ў цэлым”.
У мінулым снежні банк зрабіў прагноз па ўзроўні ВУП у гэтых шасці краінах у 2024 годзе, згодна з якім гэты паказчык больш за ўсё павялічыцца ў Таджыкістане і складзе 7,3%. Далей ідуць Арменія (+5,7%), Казахстан (+5%), Кыргызстан (+4,5%), Беларусь (+2%) і Расія (+1,5%).
Еўразійскі банк развіцця — міжнародная фінансавая арганізацыя, якая ажыццяўляе інвестыцыйную дзейнасць на еўразійскай прасторы. Статутны капітал ЕАБР складае 7 млрд долараў.
Асноўную долю ў партфелі банка займаюць праекты з інтэграцыйным эфектам у сферах транспартнай інфраструктуры, лічбавых сістэм, зялёнай энергетыкі, сельскай гаспадаркі, прамысловасці і машынабудавання.