Спіс месцаў альтэрнатыўнай службы дапоўнены двума дамамі састарэлых і цэнтрам сацабслугоўвання

19 красавіка, Позірк. Трыма сацыяльнымі ўстановамі дапоўнены спіс арганізацый, дзе грамадзяне Беларусі могуць праходзіць альтэрнатыўную службу замест вайсковай, вынікае з пастановы Міністэрства працы і сацабароны № 17 ад 8 красавіка.

Згодна з дакументам, апублікаваным 18 красавіка на Нацыянальным прававым інтэрнэт-партале, гаворка пра Дамачоўскі дом-інтэрнат для састарэлых і інвалідаў (Брэсцкі раён), Курылавіцкі дом-інтэрнат для састарэлых і інвалідаў (Мастоўскі раён Гродзенскай вобласці), а таксама Бярозаўскі тэрытарыяльным цэнтр сацабслугоўвання (Брэсцкая вобласць).

Без уліку новых месцаў праходжання альтэрнатыўнай службы ў пераліку, зацверджаным 31 мая 2016 года, фігуруе 371 установа сферы аховы здароўя, сацабслугоўвання, жыллёва-камунальнай, сельскай і лясной гаспадаркі, арганізацыі, якія займаюцца добраўпарадкаваннем тэрыторый, будаўніцтвам і рамонтам дарог і чыгуначных шляхоў.

Альтэрнатыўная служба не звязана са службай ва Узброеных сілах, іншых войсках і вайсковых фарміраваннях.

На яе могуць быць накіраваныя прыдатныя да прызыву на тэрміновую службу і службу ў рэзерве грамадзяне, якія асабіста заявілі, што прыняцце вайсковай прысягі, нашэнне, выкарыстанне зброі або непасрэдны ўдзел у вытворчасці і абслугоўванні зброі, боепрыпасаў і баявой тэхнікі “супярэчаць іх рэлігійным перакананням у той меры, у якой становіцца немагчымым праходжанне вайсковай службы”.

Грамадзяне без вышэйшай адукацыі праходзяць альтэрнатыўную службу на працягу 36 месяцаў, з ёй — 24.